بعد الخمس سنواتسنوات المراهقة

7 جمل ماينفعش تقولها لطفلك!

 

 

7 جمل ماينفعش تقولها لطفلك!

 

فيه شوية جمل بتتقال كتير للأطفال وهى غير مناسبة لطبيعة سنهم وإحتياجاتهم زى مثلا:

١. اقعد وما تتحركش من مكانك:

ده لبعض الأطفال وخاصة في السن الصغير ممكن يعتبر نوع من أنواع التعذيب. الطفل بيحتاج يتحرك ويستكشف الدنيا اللي حواليه، ده غير الفروق الفردية اللي بتخلي بعض الأطفال عندهم احتياج للحركة أكتر من غيرهم.

٢. ما تعيطش، مفيش رجل يخاف، مفيش حاجة تزعل.

الطفل محتاج يتعلم يصدق مشاعره ويعرف يتقبلها ويتعامل معها، احنا مابنختارش إننا نكون مبسوطين ولا زعلانين ولا خايفين، بس بنختار تصرفاتنا وكل ما فهمنا مشاعرنا وتقبلناها بنقدر نتصرف بشكل أحسن. الطفل من حقه يعبر عن إحساسه أيا كان، ويلاقي حد يسمعه ويتفهم مشاعره ويعلمه يتعامل معاها إزاي، لإن المشاعر دي هتقابله كتير في حياته ومش هينفع يفضل يهرب منها طول العمر.

٣. إعمل اللي إنت عايزه بس سيبني ف حالي:

فكرة إننا نتنازل عن قواعد أو اللي مطلوب منهم علشان هما بيزنوا كتير، أو أنا مفياش حيل دلوقتي، فكرة عدم الثبات على الموقف بتشتت الطفل جدا، ومن أكتر الحاجات اللي بتولد العند والزن، لإنهم بيتعلموا إن الزن ده ساعات بيجيب نتيجة. الطفل محتاج قواعد ثابتة وخطوط واضحة ما فيهاش تنازل زي ما هو محتاج قدامه مساحة ياخد فيها هو قرارات ويجرب ويغلط.

٤. إعمل كده علشان أحبك:

الطفل محتاج من الأم والأب حب غير مشروط، يعني مهما عمل هما بيحبوه وهيفضلوا يحبوه. لإن ده بيأثر جامد جدا على ثقته بنفسه طول حياته وإحساسه بالأمان وصحته النفسية، مهم إنه يعرف إن في شخص واحد على الأقل بيحبه ومتقبله زي ماهو، ومش هيلاقي حد تاني يحبه كده غير مامته وباباه.

٥. ما تكلمنيش علشان انت عملت حاجة غلط:

تكلمة للنقطة الرابعة، علاقتنا ببعض كمان محتاجة تكون غير مشروطة، الطفل محتاج لما يغلط يلاقي حد يرجعله يتكلم معاه ويعلمه يصلح غلطه ويتحمل نتايجه ويتعلم منه عشان ما يكررهوش تاني. لما بنستخدم زعلنا كوسيلة أساسية في التربية صحيح ساعات بتجيب نتيجة على المدى القصير بس بتأثر على إحساس الطفل بالثقة والأمان وبتخليه مع الوقت يحط كل تركيزه في إنه يخبي عننا أخطائه بدل ما يحكيلنا عن أي حاجة بيمر بيها عشان نساعده، وساعات لما بيوصل لمرحلة المراهقة بيكون إتعلم إننا كأسرة عادي إننا نقاطع بعض لما حاجة تزعلنا.

٦. مفيش فايدة فيك، انت علطول كده وعمرك ما هتتغير:

إنتقاد الطفل ووضع تصنيف زي إنت فاشل أو كداب أو مهمل أو عمرك ما بتتحمل مسئولية. جزء كبير من صورة الطفل عن نفسه بتتكون عن طريق نظرة مامته وباباه ليه، فلو هما شايفني جبان علطول، مع الوقت فعلا هصدق إن أنا جبان، وهحتاج مجهود كبير أوي طول حياتي علشان أغير الصورة دي عن نفسي. عايزين ولادنا يعرفوا إنهم كويسين ويقدروا يحققوا االلي هما عايزينه، ولما يغلطوا نتكلم معاهم على الفعل أو التصرف مش على شخصهم.

٧. قول حاضر من غير ما تسأل ليه:

فكرة غريبة أوي إننا نبقى عايزين أولادنا ما يشغلوش دماغهم ويفهموا اللي بيطلب منهم بيطلب ليه واللي إحنا شايفينه غلط غلط ليه، وبعد كده نيجي نزعل إنهم ما بيشغلوش دماغهم في المذاكرة، أو بيتأثروا بأي حاجة صحابهم بيقولهالهم. إبننا وبنتنا من حقهم علينا إننا نفهمهم أسباب اللي بيطلب منهم، ويتناقشوا معانا فيه، ويقتنعوا بيه، ده لو احنا عايزنهم يعملوه سواء احنا معاهم أو مش معاهم.

Facebook Comments

مي علوي

Mai Elwy, MA Counseling Psychologist and Parenting educator. Mai is the founder of Raising Happy for Parenting and Counseling Services. She received her parenting training and license in the UK and has a master’s degree in Counseling Psychology from the American University in Cairo. During her practice, Mai has worked with hundreds of parents, teachers, and social workers. She has also worked as a parenting expert for many organizations including UNICEF Egypt, and Care International, as well as many schools and nurseries.
مي علوي متخصصة علاج نفسي وتربية. مي هي مؤسسة منظمة رايزنج هابي لخدمات التربية والإستشارات النفسية. مي حصلت على ماجستير في علم النفس من الجامعة الأمريكية بالقاهرة، وحصلت على التدريب في التربية الإيجابية في المملكة المتحدة. مي قامت بتدريب مـئات الآباء والمدرسين والأخصائين على أسس التربية الإيجابية والصحة النفسية للأطفال والمراهقين.
إغلاق
إغلاق