الحياة الزوجيةقيم وعلاقات أسرية

6 حاجات ممكن تقتل أى علاقة إنسانية!

 

 

6 حاجات ممكن تقتل أى علاقة إنسانية!

تعرفوا إيه هى الـ6 حاجات اللي بتقتل أي علاقة؟!
نقد

تجاهل
لوم
عتاب

أوامر
توقعات

دول أسماء الـ6 موبقات اللي بتقتل الحب في أي علاقة إنسانية!

تعالوا نشوف إزاي ممكن نمارس الـ6 حاجات دول ونهدم علاقتنا الإنسانية مع الآخرين!

ملاحظة مهمة: مش مهم درجة الإتقان في التنفيذ لأن أي درجة هتأدي للمطلوب بكفاءة

    1. لما محبوبك يبعت لك رسالة حب تجاهله واوعى تكلف خاطرك ترد عليه.. أنت فاضي للكلام ده؟!
    2.  أول ما يتجرأ ويدخل معاك في نقاش أو يطلب منك طلب اربكه وهات له القديم والجديد وانقده واظهر له عيوبه وما تسكتش إلا لما يرفع الراية البيضا ويعلن الهزيمة ويعتذر حتى وأنت عارف إنه مش غلطان!
    3. تجاهل مناسباته الخاصة واعمل نفسك من بنها.. ما تدلعوش أحسن ياخد على كده ويقولك فين الهدية والإحتفال ووجع الدماغ ده!
    4.  اصحى الصبح وعاتبه إنه ماصحيش قبلك وبعدين روح الشغل وعاتبه إنه اتأخر في الرد على تليفونك ولما ترجع البيت عاتبه إنه مشغول عنك حتى لو بطلباتك أو بولادك وقبل ما تنام عاتبه إنه مش مقدر تعبك.. عاتب عاتب عاتب حتى الموت ..اوعى تزهق!!
    5.  كل شويه إدي له تعليمات في صيغة فعل أمر وخليك فوق دماغه لغاية لما ينفذها ولو ما نفذهاش ارجع لرقم (4) تاني وتالت ورابع.. دي فرصتك واوعي تفوتها!
    6.  افتكر دايماً واوعى تبل ريقه بكلمة حلوة.. استمر في تجاهل تعبه علشانك وأنصحك كمان تطلب منه 10 حاجات ولو عمل منهم 9 ونسي واحدة بس تبقى فرصتك الذهبية اللي مش ممكن تفرط فيها أبداً.. امسك في الواحدة دي بقى و ارجع تاني لرقم (4).. ما تنساش حتى الموت.. هاه!
    7.  نمرة (7) دي بقى هي أهم نقطة.. ما تنساش تتوقع منه إنه يفضل يحبك ويحلم بيك كمان وهو نايم ويبقى ملهوف عليك ويتمنى لك الرضا ترضى..!
    8.  دي بقى النهاية اللي أنت تستحقها.. عارف أنت تستحق إيه بقى ولا أحرق لك المفاجأة؟! تستحق تسمع الجملة دي: “خلاااااص.. أنا اتخنقت.. أنت من سكة وأنا من سكة”!

“كل اللي فات ده مش من خيالي الخصب.. ده من الناس اللي بتيجي لي  وبيعملوه بحذافيره كل يوم في العلاقة الزوجية وكمان في علاقتهم بأولادهم وبعدين يرفعوا حواجبهم بكل براءة وبإندهاش عظيم ويقولوا لي:
“أنا تعبت قوي فعلاً ومش عارف هو ليه (إبني/ بنتي/ زوجي/ زوجتي) ما بيحبنيش”؟!

عرفت ليه دلوقتي؟!

Facebook Comments

هويدا الدمرداش

هويدا الدمرداش مستشارة العلاقات الأسرية ومؤسسة علاقات البنج بونج.

إغلاق
إغلاق