homeslider

22 حقيقة عن صدر الأم

 

 

22 حقيقة عن صدر الأم

عايزين نقول لكل ست قد إيه انتي عظيمة وقوية.
ربنا خلقنا كده قوة وعظمة وعطاء متغلف بحب وحنان، خلينا نقول إن ربنا خلق جسم الست بشكل مذهل فيه بيتكون ويتخلق البيبي ويكبر ويتولد ويلاقي رزقه موجود وجاهز.

هنقولك 22 حقيقة عن صدر الأم فكري فيها وقولي سبحان الخالق.

1.صدر الأم بيصنع اللبن اللي بيكفي لتغذية البيبي وبيكون مصدر لزيادة مناعة البيبي.

2.صدر الأم فيه مضخة صغيرة بتنشط في اخر الحمل بتعمل على افراز سائل بينظف وبيرطب الحلمة عشان يقدر البيبي يعرف مكان الرضاعة.

3.صدر الأم فيه عصب ممتد خلف الصدر لما البيبي بيرضع بيحفز العصب إنه يبعت إشارات للمخ عشان يخلي الغدد اللبنية تنتج لبن تاني.

4.صدر الأم بتختلف عدد فتحات القتوات اللبنية فيه من أم لأخرى بتتراوح ما بين 4-18 فتحة في الحلمة الواحدة.

5.صدر الأم يعتبر مصنع متكامل لتكوين اللبن اللي بيطلع 3 منتجات:

المنتج الأول هو لبن المسمار ودا بينزل فى أول يومين بعد ما البيبي بيتولد وبيكون مليان أجسام مضادة ومناعة وبتكون كميته قليلة ولونه أصفر وبيغلف الجهاز الهضمي للبيبي علشان يحميه من أي أمراض.

المنتج التاني: بينزل فى اليوم التالت والرابع من بعد الولادة وبيكون كميته كبيرة وبيتكون نتيجة زيادة هرمون الأوكسيتوسن. المنتج التالت: بيكون اللبن اللي بتعتمد كميته علي كمية رضاعة البيبي وكمية سحبه لللبن.

6.تقدري ترضعي تاني حتى لو توقفتي عن الرضاعة من أسابيع أو شهور أو سنين في بعض السيدات.

7.الأم بتحس بضغط أو كهربة أو نغزة نتيجة تكون اللبن وعادة بتكون بعد ما تاكل أكلة دسمة ودي حاجة اسمها milk ejection reflex

8.الصدر مش بيفضى خالص في الرضعة الواحدة البيبي بياخد بس ثلثين اللبن.

9.الرضاعة الطبيعية مش بتخلي الصدر يترهل بعد الفطام عشان بعد 6 شهور بتبدأ تتكون خلايا دهنية بتخلي شكل الصدر يرجع لشكله قبل الحمل بس فيه عوامل كمان بتأثر زي الوراثة، السن، التدخين وزيادة الوزن.

10.مكونات لبن الأم مش بتتأثر بنسبة كبيرة بتغذية الأم إلا في حالات سوء التغذية الشديد للأم.

11.العلماء بيقولوا لما الطفل بيتعب بيوصل للأم خلال لعاب البيبي أثناء الرضاعة فبتتغير مكونات اللبن لمحاربة أي إلتهاب أو مرض بيواجهه البيبي.

12.كلمة ماما كلمة لاتينية mama معناها صدر الأم وجاية من صوت البيبي وهو جعان.

13.الصدر هو العضو الوحيد اللي بيتغير في الحجم، الشكل والوظيفة في كل مراحل حياة الأم من وقت تكوينها قي الرحم للبلوغ للحمل للفطام حتى فترة انقطاع الطمث.

14.صدر الأم البشرية بيختلف عن باقي الثدييات فصدر الأم البشرية بيكون موجود في كل مراحل حياتها على عكس باقي الثدييات بيكون موجود فقط وقت الرضاعة وبيختفي في مراحل الحياة.

15.أثناء الحمل بتكبر الحلمة وبيبقي لونها غامق ودا عشان يقدر البيبي اللي لسة مولود إنه يشوفها عشان بيكون نظره ضعيف وبيشوف على بعد حوالي 8-12 بوصة فقط.

16.نسيج الصدر بيمتد لغاية تحت الدراع عشان كدا متنسيش المنطقة دي وانتي بتعمل الفحص الذاتي لسرطان الثدي.

17.صدر الأم مش جزء من الجهاز التناسلي دا غدة مفرزة للبن غشاء مخاطي عشان كدا مينفعش تاخدي أدوية مضادة للاحتقان عشان بتأثر على كمية اللبن.

18.وزن الصدر الواحد من 150-200 جم بيتضاعف وزنه وقت الرضاعة وبيصل إلى 400-500جم.

19.الصدر الشمال غالبا بيكون أكبر من اليمين.

20.اطمني مقاس الصدر ملهوش علاقة بكمية اللبن اللي بيتكون، المقاس بيحدد فقط كمية اللبن اللي ممكن تتخزن.

21.الصدر له دور مهم جدا في زيادة الحميمية أثناء العلاقة الزوجية.

22.تدليك الحلمة بيعمل علي افراز هرمون الأوكسيتوسين اللي بيحفز عملية الولادة.

 

Facebook Comments

د. هناء محمد أبو القاسم

استشارى النساء والتوليد – مركز الأسكندرية الإقليمى لصحة وتنمية المرأة

إغلاق
إغلاق