الأمومةمذكرات أم

10 حاجات اتعلمناها من أزمة الكورونا

 

10 حاجات اتعلمناها من أزمة الكورونا

 

موضوع الكورونا دا بصرف النظر عن صعوبته علينا كلنا والألم النفسي اللي سببه لينا وخوفنا وهلعنا من المرض والموت بس علمنا دروس مش هننساها أبداً.

دول ١٠ حاجات طلعنا بيها من الأزمة دى:

١. أول حاجة عرفنا إن يومنا الروتيني الممل المرهق، اللي كنا طول الليل والنهار بنشتكي منه كان نعمة كبيرة أوي معرفناش قيمتها غير متأخر.

٢. عرفنا إن ولادنا أغلي بكتير مما كنا نتخيل. أكتر حاجة كسرت قلبي ووجعتني هي ردود أفعالهم وإحساسهم بالخوف أو الزهق من كل اللي بيحصل وأنا مشلولة مش عارفة أعمل حاجة.

٣. عرفنا إن الفلوس مش بتحل كل المشاكل. محدش فينا الفلوس نفعته في حاجة ولا عرفت تحسسنا بالأمان أو تعوضنا عن كل اللي إتحرمنا منه الأيام دي.

٤. عرفنا إن كل حاجة قولنا مستحيل نستغني عنها يوم طلع عادي جدا ممكن نعيش من غيرها خالص بس احنا اللي مجربناش. طلع ممكن نعيش من غير مولات ونوادي وخروج ومدارس وأصحاب وحاجات كتيرة تانية ملهاش أول من آخر.

٥. عرفنا إن أغلي حاجة هي الصحة وإن الحياة ممكن تقف حرفياً بس علشان ننقذ روحنا وصحتنا وصحة كل اللي يهمونا.

٦. عرفنا إن وقت البيت والعيلة اللي كنا مش بنديه إهتمام وتركيز هو أهم حاجة ممكن نعملها سوا.

٧. عرفنا إن قعدة البيت اللي كنا بنهرب منها كعيلة ممكن تبقى حلوة ومسلية وفيه مليون حاجة ممكن نعملها مع بعض.

٨. عرفنا إن كل حاجة كنا بنجري وراها ومهتمين بيها طلعت سراب وملهاش أي قيمة حقيقية.

٩. عرفنا إن الدنيا ممكن يتقلب حالها في يوم وليلة وإن دوام الحال من المحال.

١٠. عرفنا إننا المفروض نحاول نقرب من ربنا كل يوم أكتر علشان الدنيا فانية أكتر بكتير مما كنا نتصور.

 

Facebook Comments

ديانا فريد

ديانا هى زوجة وأم لتوأم تستمد إلهامها من الطبيعة والموسيقى وتستغل شغفها بالكتابة فى توثيق اللحظات المميزة لتلهم الآخرين، وتنشر كتاباتها فى عدد من الأماكن بمصر والخليج.
كما أنها من خلال صفحتها على الفيس بوك Twin Mummy’s Diary تتشارك مع الأمهات فى خبراتها ونصائحها المفيدة التى تكتسبها خلال رحلتها مع الأمومة المليئة بالمغامرات والتحديات.

إغلاق
إغلاق