بعد الخمس سنواتسنوات المراهقة

هل فعلا بنحاول نحقق حلمنا – اللي مقدرناش نحققه – في أولادنا؟

 

 

هل فعلا بنحاول نحقق حلمنا – اللي مقدرناش نحققه – في ولادنا؟

 

كتير بنعمل حاجات مع ولادنا من غير مانحس مع إننا بنلوم أهالينا إنهم كانوا بيعملوها معانا، واحدة من الحاجات دي هي إننا بنحاول نحقق حلمنا -اللي مقدرناش نحققه– فيهم.

نلاقي الأم نفسها بنتها يكون لها شكل معين لأنها ماقدرتش تحقق ده بنفسها في حياتها والأب مثلا يخلى ابنه يلعب رياضة معينة كان نفسه يتعلمها وهو طفل بس ماقدرش.

هو ده مش غلط بشرط إن تكون دى رغبة الطفل كمان أو حلمه لأن الطفل إنسان له رغبات وأحلام هو كمان نفسه يحققها في حياته فماينفعش أرغمه يعيش حياته يحققلي حلمي أنا بداله.

فيه أب قالي مرة إنه قرر يدخل ابنه مدرسة فرنسي لأنه وهو صغير كان حاسس إنه أقل من قرايبه اللي عارفين يدخلوا المدارس الفرنسية ويتقنوا اللغة وده كان بيأثر علي ثقته في نفسه وقتها أوي وعايز ابنه يطلع بيتكلم فرنسي علشان يكون واثق من نفسه ويعيش سعيد، مع إن ابنه دلوقتي بيعافر مع اللغة وبيكرهها بس هو واثق إنه هيقدر لما يكبر!

هل فعلا كل اللي بيتكلموا فرنسي عندهم ثقة في النفس؟ هل النظريات بتأكد الكلام ده؟ هل الهدف الحقيقي من التحاقه بالمدرسة دي هو بناء الثقة في النفس؟ ولا علشان يحققله حلمه اللي هو نفسه ماقدرش يحققه؟
هل ممكن الطفل ده يكبر ويدخل أولاده مدرسة ألمانية مثلا ويقول أصل كنت بحس بعدم ثقة في النفس علشان مكنتش بعرف أتكلم ألماني زي ابن خالتي؟
محتاجين نكون أكتر صراحة مع نفسنا وتكون اختياراتنا اللي بنعملها لولادنا مبنية على أسباب واقعية ومناسبة لحياتنا وحياتهم وقدراتنا وقدراتهم مش مبنية علي تجارب شخصية  وترسبات قديمة من طفولتنا.

محتاجين نراقب اهتمامتهم ونقط قوتهم وننميها علشان نساعدهم يحققوا حلمهم اللي هما اختاروه مش حلمنا، محتاجين نبطل نتحجج بالأسباب الغير واقعية وإحنا فى الحقيقة بنحاول نوصل لهدفنا الشخصي لأن ببساطة هم مش إحنا ودى حياتهم مش حياتنا.

يعني لو عايز تربي ثقة في النفس مثلا اتعلم واقرأ عن إيه اللي يساعدك تبنيها وإيه اللي ممكن تعملها يهدها وبكده تحقق هدفك من غير ماتدخل مشاكلك من الطفولة فى تجربة ابنك، وادعي واستخير ربنا ينور بصيرتك ويهديك ويسهلك إنك تساعده يحقق اللي فيه مصلحة له.

Facebook Comments

نهى أبو ستة

Noha is a certified Health Coach by Dr. Sears Wellness Institute, a certified Positive Discipline Parent Educator and a passionate mother of two. Through her blog, she hopes to empower families and parents to lead a healthy, happy and well balanced life inside out.

إغلاق
إغلاق