هل أنتِ أم مهمومة أم موهومة ؟
حب الأمهات الشديد لأولادهم بيخلى عندهم دايما
حالة من القلق والصوت الداخلى اللى غالبا بيضلم الطريق ادامها ويقفله
ايه الفرق بين الهم و الوهم؟
الهم يعنى يكون فى مشكلة حقيقية عند الطفل موجودة وشاغلة تفكير الأم.
طيب والوهم؟
الأم الموهومة هى اللى بتتخيل وجود مشكلات غير موجودة اصلا
يعنى مثلا يبقى الطفل زى الفل فى الحضانة وهى عندها وهم أنه أكيد مش هيكمل كويس فى الدراسة وأكيد هيحصل مشاكل.
الأم الموهومة للأسف بتتوحد عاطفيا وذهنيا مع كل مشكلة تسمعها أو تقرأها وتطبقها على نفسها وحياتها.
الاتنين الأم الموهومة والمهمومة مش بيستمتعوا برحلة الأمومة ودايما بيحسوا إن أولادهم عبء عليهم
ودا بينعكس على أطفالهم وبيخلى عندهم عدم استقرار نفسى وقلة ثقة بالنفس وتخبط فى التفكير.
ايه الحل للقضاء على إحساس الهم والوهم؟
– اليقين والرضا
فكرى نفسك باستمرار إن يكون عندك يقين وإيمان بالقدر اللى ربنا مقدره ليكى ولأولادك وإنك مهما عملتى فيه قدر ونصيب ورزق مكتوب.
– كل ما تقلقى اتعلمى
لما بنفهم بنهدا لأننا بنعرف أبعاد المشكلة وأساسها وحلها لأن ساعتها بنتعامل مع شىء معلوم مش مجهول.
لو فيه مشكلة طفلك بيواجهها ابحثى واقرأى واسألى مختص ودورى على اللى يفهمك ويصارحك ويعلمك.
– افصلى علشان تقدرى تكملى
بلاش تركزي حياتك على أولادك وبس لأن دا بيسبب توتر مستمر وبيخليكى حاسة إن أى مشكلة بسيطة هى مشكلة كبيرة.
خصصى جزء فى يومك ليكى انتِ وبس لممارسة هواية أو التفاعل مع ناس ايجابية يمدوكى بالطاقة.
الثلاث خطوات دول هيبعدوكى عن إنك تكونى أم موهومة أو مهمومة.
ربنا ينور طريقكم بالإيمان والوعى و العلم
Facebook Comments
ريهام سمير مستشارة مهنية في التعلم وتنمية المهارات الشخصية. ريهام أخصائية معتمدة في عسر القراءة من مركز بلاكفورد – لندن وعضو في جمعية عسر القراءة البريطانية. وهي مُعلمة معتمدة للانضباط الإيجابي في الفصل الدراسي من الرابطة الدولية للانضباط الإيجابي في الولايات المتحدة الأمريكية ، ومُنسِّقة معتمدة في اللغة الإنجليزية في TEFL وممارس معتمد في البرمجة اللغوية العصبية من المجلس الأمريكي للغة البرمجة اللغوية العصبية. تطبق ريهام تقنيات التعلم والتعليم الخصوصية الأكثر تقدمًا لخدمة أنواع عديدة من العملاء من مختلف الأعمار والأنظمة التعليمية.
