الحياة الأسريةالحياة الزوجيةالسنوات الأولىبعد الخمس سنواتسنوات المراهقة

نعمل إيه لو حصل خناق قدام الأولاد؟

 

 

نعمل إيه لو حصل خناق قدام الأولاد؟

 

في ظل قعدة الأسرة كلها في البيت مع بعض أكتر من العادي ومع الضغوطات والتوتر اللي ناس كتير فيه الفترة دي، حابة أقول بعض المعلومات والاقتراحات عن موضوع بايخ بس مهم جدا وهو أسلوب الخناق بين الزوج والزوجة قدام الأولاد:

١. الأطفال حساسين جدا للخناق بين الأم والأب، بسمع كتير كلام زي “هما مش بيبقوا مركزين أصلا”، أو “لسه صغيرين مش فاهمين حاجة” أو “خلاص اتعودوا”، مع الأسف هما مركزين وفاهمين ومتأثرين أكتر مما نتصور بكتير، في أبحاث لقت إن حتى البيبي اللي عنده ٦ شهور ولسه مش فاهم حاجة من الكلام، ضغط دمه بيرتفع من صوت خناق الأم والأب وإنه بيعرف يفرق بين صوت الكلام العادي والخناق. وحتى الأبناء اللي كبروا وبقوا شباب بيفضلوا يكرهوا خناق أهلهم ويتأثروا منه حتى لو مش بيبينوا ده.

٢. الخناق المتكرر اللي مش بيتحل واللي فيه أي نوع من أنواع العنف أو الإهانة أو عدم الإحترام بيأثر على حالة الأطفال النفسية وإحساسهم بالأمان وبيزود مشاعر الخوف والتوتر والحزن والإحساس بالذنب. ده غير إنه بيكون جزء من تكوين صورة الطفل عن العلاقات اللي ممكن تستمر معاه طول حياته.

٣. الهدف مش إننا مانختلفش ولا نمثل إن علاقتنا فيها سلام تام، لإن ده برده هيدي صورة غير واقعية عن العلاقات. الهدف إننا نختلف ونعبر عن مشاعرنا بس نحط حدود للإحترام وسقف لأسلوب التعبير عن الغضب اللي أولادنا بيشوفوه، لما يشوفونا بنتعامل مع غضبنا وإختلافاتنا بشكل صحي، هيتعلموا هما كمان يتعاملوا مع مشاعرهم بشكل صحي.

٤. لو الخلاف بدأ قدامهم، نحاول نسمع ونتفهم ونحل، لو لقينا نفسنا هنخرج عن شعورنا أو هبدأ نغلط ونتعصب بزيادة، حد فينا يقترح إننا نستنى لما نهدى عشان نعرف نتكلم، وياريت التاني يستجيب مهما كان الكلام مزنوق في زوره. ونطمنهم دايما إننا هنتكلم ونحل المشكلة مع بعض علشان ما يفضلوش هما قلقانين من التوتر اللي حصل ومش عارفين أخره ايه.

٥. لما نختلف قدامهم، نركز على حل المشكلة، مش على الاتهام واللوم وإننا نغلط بعض وندافع عن نفسنا. ونركز في الموضوع اللي بدأناه ما نفتحش حاجات قديمة أو خلافات تانية. ولو شافونا بنتخانق وجرحنا مشاعر بعض، محتاجين برده يشوفونا واحنا بنصلح اللي كسرناه. فلو غلطنا في بعض قدامهم، نعتذر لبعض برده قدامهم، ولو الأطفال صغيرين اوي ومش فاهمين احضنوا بعض أو طبطبوا على بعض علشان يفهموا إنكم كويسين مع بعض ويطمنوا.

٦. نتفق مع بعض على المواضيع اللي مش بنخش في مشاكلها قدام الولاد، زي مثلا طرق التربية، المشاكل مع عائلات بعض، أو المواضيع اللي انتو عارفين إن الحوار دايما بيحتد فيها وممكن يقلقهم.

٧. أرجوكم ما تدخلوش الأطفال في خناقاتكم ولا تشتكولهم من بعض وتشهدوهم عليكم أو تطلبوا منهم ياخدوا صف حد. الموضوع ده حمل نفسي كبير على الأطفال أكتر ما تتخليوا مهما كانوا مش بيبينوا ليكم اد ايه ده بيتعبهم ويلخبطهم.

في الآخر، لو الخناقات مستمرة وما بتتحلش وبتزيد، بدل ما نقول هنضطر نعيش كده في عذاب علشان خاطر الولاد، يا ريت نقول هنجرب نشوف حد متخصص يساعدنا علشان خاطرنا وعلشان خاطر الولاد.

Facebook Comments

مي علوي

مي علوي متخصصة علاج نفسي وتربية. مي هي مؤسسة منظمة رايزنج هابي لخدمات التربية والإستشارات النفسية. مي حصلت على ماجستير في علم النفس من الجامعة الأمريكية بالقاهرة، وحصلت على التدريب في التربية الإيجابية في المملكة المتحدة. مي قامت بتدريب مـئات الآباء والمدرسين والأخصائين على أسس التربية الإيجابية والصحة النفسية للأطفال والمراهقين

زر الذهاب إلى الأعلى
إغلاق
إغلاق