الشهور الأولى للمولوديوميات ماما

من النهاردة مفيش قرف

 

من النهاردة مفيش قرف

من النهاردة مفيش قرف

يوميات ماما #١٣

من واقع خبرتى المتواضعة في الأمومة، اكتشفت إن الست لما بتبقى أم بتكتسب مناعة طبيعية ضد القرف، كم التجارب اللى بتتعرض لها بيخليها تجمد وتنشف وبعد فترة بتبدأ تبص للناس كلهم على إنهم (إنفين).

يعني أول إختبار حقيقى للقرف هتتعرضى له هيبقى وإنت حامل، خصوصًا لو كنت من ذوات الوحم الصعب..الترجيع الكتير ده في حد ذاته بيلغى فكرة القرف وبيعودك عليها..زمان لما كنت برجّع كنت بقرف جدًا وأمسح الحمام والكوريدور وأغير هدومى وأستحمى وأعمل ليلة..لما بدأت أرجع في الحمل بالخمس مرات في اليوم جسمى نحّس خلاص..بقيت أمضمض بقى وأغسله بالمعجون وأغسل وشي وخلاص..لا، واتعلمت أرجع إزاى في اي مكان..في البيت والشارع والشغل والمول..عادى خالص

تانى إختبار للقرف في الحمل هو إختبار إنفجار كيس الماء..عادى خالص تبقى قاعدة لا بيكى ولا عليكى تلاقى الدنيا تحتك مبلولة وغرقانة ومفيش أى مشاكل خالص.

أما بقى لو كنتى محظوظة وكنت بتولدى من غير بنج، أو بتخدير يسمح لك إنك تبقى في وعيك وقررتي تحضنى البيبي بعد خروجه مباشرة فمش عايزة أوصف يعنى إيه حد يحضن حد ملزّق دهون ومليان دم..لكن الحب يا مامى ممكن يعمل أكتر من كدة.

بعد إختبار أو إتنين من دول يا مامى هتاخدى مناعة طبيعية ضد القرف..وخدى عندك بقى: هدوم  تتبلبل كل شوية بسبب الرضاعة، أشط على هدومك وعلى وشك وعلى شعرك، ترجيع مفيش مانع برضه.

نيجي بقى لتغيير البامبرز، ده بقى عامل زي التطعيم إللي بيقوى مناعة القرف، فجأة هتتحولى من “ياى ريحة الحمام ده وحشة قوى”، لواحدة بتحط إيديها شخصيًا في فضلات إنسان آخر..الكوميدى بقى إنك هتلاقي نفسك ومع كل هذا القرف بتقولى بمنتهي الحب وأنت بتغيرى لابنك: “إنتى حلوة..إنتى جميلة..بتعملى كى- كى..يا كميلة” وطبعًا جوزك هيبص لك وهو ومش مصدق إنك وصلتي للمرحلة دى يا عينى. هتعدى عليكى حاجات مقرفة طبعًا زى الإسهال..ولو كان عندك توأم زي حالاتى ممكن تغيرى 12 مرة بامبرز يحتوي على فضلات صلبة في يوم واحد وربنا يكون في عونك بقى. طبعًا أول أكلة ملوخية مش محتاجة كلام وأنا عارفة إنه الماميز إللي إبتدوا يأكلوا ولادهم ملوخية will relate  🙂

الرجالة أو الناس بوجه عام عمرهم ما هيحسوا ده ولا هيقدروا يفهموا التغيرات إللي بتحصل لنا دى..ربنا بيغير فينا عشان يهيئنا نفسيًا للمهام دى ونعرف نعملها بحب وإخلاص. أصل لو محدش عملها ليهم بحب، مفيش حد تاني هيعملها.

أنا بحب أولادى.. والأشط بتاعهم على قلبى أحلى حاجة فى الدنيا!  

*هذه المقالات تعكس وجهة نظر الكاتبة وهدفها نقل الخبرات الشخصية مع الأمومة. ننصح كل أم أن تأخذ ما يناسبها فقط وتستشير طبيبها الخاص فى الأمور الطبية.

Facebook Comments

شيماء الجمال

شيماء الجمال كاتبة ومدونة فى مجال الأم والطفل ومؤسسة موقع أنا حامل. للتواصل معها يمكنكم مراسلتها على info@ana7amel.net.

تعليق واحد

إغلاق
إغلاق