تغذية طفلكصحة ونمو طفلك

معاناة أم مع أطفالها فى البرد

 

grippewelle

 

معاناة أم مع أطفالها فى البرد

كل سنة وأنتم طيبين.

فى كل سنة فى نفس الوقت ومع دخول الشتا بتبتدى تظهر أدوار البرد وخصوصا الأطفال اللى بينزلوا الحضانة أو المدرسة.. النهاردة هتكلم بصفتى أم عندها خبرة فى تغذية الأطفال فى مجلتى العزيزة عالم الأم والطفل..

أولا: الوقاية خير من العلاج. فعلا إحنا لو عودنا أطفالنا على وجبات مغذية يوميا هتساعد كتير فى التعافى والحماية من أدوار البرد (وجبات فيها جزر وخضروات وشوربة وليمون وأكيد عسل).

هقولكم على بعض الخدع: أولا نبشر جزر ف معظم الأكل زى الكفتة أو صلصة طماطم المكرونة وممكن حتى فى عجينة البيتزا المنزلية بجد مش بيبان طعمها أبدا ولكن هناخد الفايدة؛ وممكن كمان نبشر الكوسة صغير جداً مع معظم الأكلات اللى ذكرتها.. وطبعا أسهل من كل ده نعودهم على شوربة الخضار ونملاها ألوان كتير.. جزر وكوسة وبسلة وبطاطس وبروكلى.. وأنا شخصيا علشان بنتى ترضى تشربها بحرص على غناء أى أغنية محببة ليها أصل هو الموضوع فعلا مش سهل وعايز صبر ثم الصبر وكله يهون علشان صحتهم وعلشان نبعد عن المضادات الحيوية اللى بتضعف المناعة والدكتور المعالج لبناتى دايما يقول كده خلينا نقاوم الأمراض بالغذا مش الأدوية..

*العصاير الفريش مهمة جدا زى البرتقال والليمون والجوافة هايلة لأنها مليانة فيتامين c وممكن نحطهالهم فى الكوبايات اللى مرسوم عليها شخصيات كرتونية.

آخر حاجة عايزة أقولها بجد “الشمس” وما أجملها فى بلدنا الحمد لله. لازم نشمس الأطفال يوميا علشان ياخدوا فوايدها وتساعدهم فى بناء عظمهم لأن الدكتور  دايما بيقول البلاد اللى مش فيها شمس مليانة بالأمراض وبيضطروا لإعطاءهم فيتامينات للتعويض زى فيتامين د، وإحنا الحمد لله الشمس موجودة طول السنة.

ملاحظة: تهوية البيت والفرش بردوا من الحاجات المهمة جدا.. وغسل الايدين قبل الأكل وبعد الأكل وتنظيف الأرض والحمامات بالمطهرات. ربنا يحفظهم يارب

Facebook Comments

إيمان عبد الرحمن

Eman Abdel Rahman is an Egyptian wife and mother. Eman is a cup cakes/cakes supplier and a part time host of several TV shows.

إغلاق
إغلاق