مافن الخضروات
كتير بنحتار كأمهات فى تقديم وجبة فطار أو عشا مغذية بعيدا عن الملل والشكل التقليدى للوجبات.. الوصفة دى هايلة عشان مستخبى فيها حاجات مغذية والمافن والكب كيك محبب جدا للأطفال بسبب شكله وحجمه كمان، بس دايما بيتقدم كحلو النهاردة بقى هنقدمه حادق وتقدرى تغيرى وتدخلى الخضروات المتاحة عندك هى ذوق شخصى وإختيارى جدا؛ أنا بس هحاول أقدملك أفكار وإنتى إبتكرى بقى 🙂
المقادير:
٢ كوب دقيق أبيض وأسمر (ممكن كله أبيض وممكن كله أسمر) عايزين نجمع مابين الفايدة والطعم والشكل.. ولو أطفالك بيحبوا طعم الشوفان نقدر نطحن كمية منه ونحطه على المقدار ويبقى مثلا كوب دقيق أسمر ونصف كوب شوفان ونصف كوب دقيق أبيض
٢ بيضة
كوب ونصف لبن
١ فلفل أحمر مقطع صغير
١ جزرة مبشورة
نصف علبة ذرة صفرا حلوة
شوية بقدونس
ملح وفلفل
٢ ملعقة صغيرة بيكينج باودر
جبن مشكلة للوجه (موتزاريلا، شيدر، جودة .. زى ما تحبوا)
الطريقة:
نخلط كل المكونات السابقة بالمضرب أو “الويسك” ونغرفها فى قوالب المافن بعد ما دهناها بالزيت.. أو نحطها فى قوالب الكب كيك الورق ونرش فوق الخليط الجبن.. وتدخل الفرن على حرارة ٢٠٠ أو ٢٢٠ لمدة ٢٠ دقيقة لحد ما تستوى..
وبالهنا والشفا . 
Facebook Comments
إيمان عبد الرحمن زوجة وأم مصرية. إيمان مورد كعك / كعك ومضيف للعديد من البرامج التلفزيونية بدوام جزئي.
