السعادة وراحة البالقيم وعلاقات أسرية

كل عيد حب وأنت طيبة

 

كل عيد حب وأنت طيبة

كل سنة وأنتم طيبين بمناسبة عيد الحب

وربنا يجعل أيامنا كلها حب فى حب، أول ما نسمع الجملة دى بنفتكر أغنية أم كلثوم ” الحب كله” وهى بتقولها بصوتها الجميل

والجملة دى بتنطبق على حب الأم لأولادها اللى هو حب من نوع خاص جدا، حب بلا مقابل، حب بلا شروط، حب مدى الحياة.

بس فى حاجة محتاجين نقف عندها وهى أن حياتنا فيها ناس كتير غير أولادنا، أولهم أحنا، لازم نحب نفسنا الأول، لأنها هى الأساس اللى ساعدت أنها تمنح الحياة لأولادنا وترعاهم .

وعشان نحب نفسنا محتاجين

 التقبل

نتقبل نفسنا زى ماهى بصفاتها و مزاياها وعيوبها

 الدلع

محتاجين ندلع نفسنا، نطبطب عليها ولا نلومها لو غلطت ولا نعاقبها لو نسيت.

 ننميها

العقل والقلب لو ما أشتغلوش بيجلهم تبلد، يعنى بيتوقفوا عن العمل بكفاءة. عشان كده محتاجين كأمهات نشحن قلوبنا بالحب وعقلنا بالمعلومات من وقت لتانى عشان يشتغلوا صح ويفضلوا فى حياة و نشاط.

نمى قلبك بحب الآخرين اللى حواليكى، أصحاب، أهل، ناس بتساعديهم. وأشحنى عقلك بعلم يغذيه من خلال تدريب أو قراءة و أطلاع

 الطاقة

طاقتنا بتقل مع مسئوليات اليوم والجرى والجرى يمين وشمال، جوا البيت وبرا البيت

وبنلاقى كل شوية بطارية طاقتنا بتصرخ، عايزة شحن وأحنا مش سامعين، لغاية ما تفصل وساعتها بنجرى نشحن ولو 10% بأكل أو نوم خطف فى خطف عشان نلحق نخلص و برده بتخلص بسرعة ونعيد الكرة من جديد.

الحل أننا عايزين مصدر طاقة متجدد، مصدر طاقة ذاتى نقدر نعتمد عليه فى كل وقت وهو شاحن السعادة والأحساس بالرضا، التفاؤل و ليقين فى الله أن كل ما هو مقدر  لينا خير. نشغل نفسنا باللى معانا ونسيب اللى مجاش يجى فى وقته لو خير لينا .

عشان كده فى عيد الحب السنة دى عايزين أول هدية نجيبها تكون لنفسنا لأنها تستحق مننا تكون أول من نفتكره وندلعه.

وبلاش ندى كل حبنا لأولادنا، أحنا وناس تانية كتير محتاجين ينالوا من الحب جانب

 

Facebook Comments

ريهام سمير

Riham Samir is a professional consultant in learning and personal skills development. Riham is a certified specialist in Dyslexia from Blackford Center – London and a member in British Dyslexia Association. She is a Certified Classroom Positive Discipline Educator from The International Association of Positive Discipline in USA, a Certified TEFL English facilitator and Certified NLP practitioner from The American Board of NLP. Riham applies the most advanced learning and tutoring techniques serving several types of clients from different ages and educational systems.

إغلاق
إغلاق