الأمومةجديد على الساحة

كفالة الأطفال فى مصر: للأمومة أكثر من طريق!

 

كفالة الأطفال فى مصر: للأمومة أكثر من طريق!

رشا مكي هي سيدة مصرية متزوجة وكان نفسها تبقى أم وبالفعل حاولت لمدة 20 سنة بمختلف الوسائل زى التلقيح الصناعى وغيره لكن ربنا ما أرادش انها تكون أم بالطريقة دى.

ولما رشا تمت 45 سنة جتلها فكرة انها تتبنى طفل وتبقى هى وزوجها أسرته البديلة.

طبعا ناس كتير هتقول التبنى حرام وهنا حابين نوضح إن الشريعة الإسلامية بتمنع بس نسب الاسم للأسرة البديلة، لكن الكفالة في البيوت مش ممنوعة بل بالعكس دى بتساعد على دمج الأطفال ومنحهم مستقبل أفضل.

وبالفعل زارت رشا أحد دور رعاية الأيتام وشافت ساعتها مصطفى وهو طفل عمره ٤ أيام  وشاء القدر انها تتعلق بيه وتقرر تضمه لأسرتها. واجهت رشا صعوبات كتيرة فى تخليص الإجراءات لكن الأصعب من كده كانت تعليقات الناس اللى كانوا شايفين_على حد تعبيرهم_انهم راحوا جابوا طفل من الشارع علشان يصرفوا عليه فلوسهم!

ومن هنا قررت رشا انها تعمل حملة توعية عن موضوع كفالة الأطفال وعملت صفحة على الفيس بوك بعنوان
An adoption story in Egypt

بتحكى فيها عن قصة تبنيها لمصطفى وعن الرحلة اللى مروا بيها سوا خلال الأربع سنين اللى فاتوا بهدف زيادة الوعي بالتبني في مصر والشرق الأوسط وعلشان تقدر بخبرتها فى الموضوع ده انها تقصر الطريق على ناس كتير ممكن يكونوا حابين يخوضوا التجربة ومش عارفين يبتدوا إزاى ومنين.

رشا بتساعد الناس من خلال الصفحة عن طريق انها بتعرفهم الإجراءات المطلوبة، وكمان بتنشر عن وجود أطفال حديثي الولادة وأماكنهم كمساعدة في الربط بين الأطفال والعائلات اللي بتدور على أطفال.

رشا وضحت معلومة مش ناس كتير يعرفوها عن السماح للسيدات العازبات بالتبني مش بس المتزوجين ودا فى اطار خطة وزارة التضامن الاجتماعي في مصر لتقليل عدد دور رعاية الأيتام والاتجاه لثقافة الأسر البديلة.

رشا شايفة ان كفالتها لمصطفى هى أحسن حاجة حصلت لها فى حياتها ونفسها يرجع بيها الزمن قبل ما تكون ضيعت وقت وفلوس كتير فى محاولة انجاب طفل لأنها مكانتش تعرف قد ايه ممكن الانسان يحب طفله بالتبنى.

Facebook Comments

فريق عمل موقع عالم الأم والطفل

Our team is always on the look out to bring our readers the latest news, happenings and inspiring and useful tips that others have shared.

إغلاق
إغلاق