يوميات ماما

كتيب القصاقيص العجيب

 

كتيب القصاقيص العجيب

كتيب القصاقيص العجيب

يوميات ماما#8

 أول مرة اتعرفت على مصطلح Scrap book كنت فى أولى جامعة وكان عن طريق واحدة صاحبتى أمريكية، قالت لى إنتِ بتحبى تقصقصى وتلزقى وتكتبى مذكراتك إنتِ لازم تعملى Scrap book لأنك هتتسلى بيه قوى. وعجبنى الموضوع وبدأت أدخل على النت وأشوف إزاى ممكن أجمع قصاقص صغيرة وأتصور صور وأكتب تحتها تعليقات وأجمعها كلها فى كتاب أو فى البوم واحد..كانت لعبة لذيذة وحبيتها قوى ودلوقتى كل فترة أقعد أتفرج على ذكرياتى أيام الجامعة.

 بعد ما خلفت إبنى الأول قررت أعمل له بإيدى Baby book مميز أجمع فيه حاجات كتيرة قوى واديهوله لما ييجى يتجوز..(أكيد خطيبته هتحبنى قوى على الهدية دى) وبنفس المنطق بدأت أشتغل على كتاب للتوأم مالك ونديم برضه.

 بس الفرق الوحيد بين كتاب فراس وكتابهم، إنه كتابه عملته لوحدى بالكامل من الألف إلى الياء وده كان شئ مرهق جداً وأخد منى وقت رهيب، وبعدها بشوية بدأت الكتيبات الجاهزة دي تبقى موجودة فى مصر بأشكال لطيفة وبقى عليكى بس إنك تكتبى فيها وتجمعى فيها الحاجة. لكن الموجود حاليا فى مصر ما يعتبرش رخيص قوى ولو مستغلياه ممكن تعملى واحد بنفسك. يعنى إللى باللغة العربية (وده نادر شوية) بحوالى 40-60 جنيه وبالنسبة للى باللغة الإنجليزية فأقل حاجة شفتها فى مصر كانت بتبدأ من 70 جنيه ودول موجودين فى المكتبات الكبرى ومحلات الأطفال الكبيرة.

 بالنسبة للكتاب اليدوى ممكن تعمليه بطريقتين: يا إما تجيبى البوم صور كبير جداً خاص بالأطفال (يكون الجزء الشفاف منه بيتفتح ويتقفل يعنى مش متقسم على مقاس صور محددة). يا إما تجيبى أكلسير لونه لطيف وتخرمى ورق كانسون A4 وتحطيه جواه. بالنسبة لتزيين الورق ده ممكن تعملى أشكال زى ما إنتِ عايزة بالورق المقوى وتلزقيها، وممكن تطبعى موتيفات بسيطة من على الإنترنت وتلزقيها، وممكن تستخدمى الترتر الجديد اللى على شكل ببرونة وشخليلة والحاجات الظريفة دى..مفيش مانع كمان من شوية Glitter وماركر وألوان لو بتحبى الرسم.

 لو اخترتِ تعملى كتيب القصاصات بنفسك هتحتاجى تخصصى صفحة لكل نقطة من النقط دى عشان تتابعى فيها  تطور البيبى:

– حملك والأسماء اللى كنتى مقترحاها  لجنينك واحساسك لما عرفتى إنك حامل (صورة ليكى وانتى حامل – صورة للبيبى فى السونار).

– شجرة العائلة (ممكن تحطى صور لأفراد العائلة). هتلاقى على الإنترنت نماذج جاهرة ممكن تشتغلى عليها.

– تفاصل ولادة البيبى: اليوم، الساعة، الظروف، مين كان موجود فى المستشفى، إسم الدكتور اللى ولَدك (صورة ليكى فى المستشفى- صورة للبيبى فى الحضّانة- صورة للبيبى مع باباه).

– أسماء زوار المستشفى والهدايا اللي جابوها للبيبى.

– الكروت اللى جابوهاله الناس (الزقيها).

– صفحة لمقاس يد البيبى ورجله وهو مولود، وفى عمر 6 شهور، وفى عمر سنة.

– صفحة لأى حاجات عايزة تحتفظى بيها: رقم سريرك فى المستشفى، الإسورة اللى بتبقى فى يد المولود، حتة من شعره..براحتك خالص).

– أول مرة: يبتسم – يضحك – أول كلمة – أول طعام صلب -أول سنّة – يسقف – يحبى – يمشى… وحطى بقى كل اللى انت عايزاه (صور بقى).

– متابعة وزنه وطوله كل شهر بالتاريخ.

– التطعيمات اللى أخدها (الواحد بيحتار لما بيكبر يعرف هو أخد تطعيم الجديرى المائى ولا لأ).

– الاستحمام وذكرياته وتفاصيل (الصورة الشهيرة بتاعة العيال وهما قاعدين فى الطشت).

– أول سفرية وذكرياتها بالصور.

– أول عيد ميلاد.

– أى ذكريات خاصة.

 هتلاقى التفاصيل دى كلها وزيادة كمان موجودة فى الكتيبات الجاهزة..اشترى الكتاب بقى أو جهزيه فى الشهر التاسع..أنا كنت بتسلى جداً أول إسبوعين بعد الولادة إنى أملاه ودايماً مخلياه قدامى عشان ما أنساهوش.

 أشوفكم قريب يا ماميز!

 *هذه المقالات تعكس وجهة نظر الكاتبة وهدفها نقل الخبرات الشخصية مع الأمومة. ننصح كل أم أن تأخذ ما يناسبها فقط وتستشير طبيبها الخاص فى الأمور الطبية.

Facebook Comments

شيماء الجمال

شيماء الجمال كاتبة ومدونة فى مجال الأم والطفل ومؤسسة موقع أنا حامل. للتواصل معها يمكنكم مراسلتها على info@ana7amel.net.

إغلاق
إغلاق