قطر الجواز
ممكن حد يعرف لى سن العنوسة بيبدأ بسن كام وبينتهى بكام؟ سن العنوسة ده بيفكرنى بمصطلحات احنا عملناها زى التمثيل المشرف؛ نروح كأس العالم ونخرج بعد أول ماتش بس نخترع لفظ علشان نريح ضميرنا؛ زى “هى رشوة ولا إكرامية”؟؛ كل واحد بيسميها علشان يرتاح… بس احنا اللى اختارنا نصدق، الستات عايشين حياتهم بين سن يأس وسن عنوسة والأتنين مش موجودين أصلا بس هو ضغط مجتمعى مش .هيودينا فى أى حتة. الحياة اختيار… إنتى لازم تختارى تعيشى إزاى
ساعات بلاقى أب كل همه إن بنته تتجوز واحد غنى علشان تعيش مرتاحه وممكن يرضى بأى حد لمجرد إن بنته كبرت وفاتها قطر الجواز ودا أكبر غلط. وأحب أقول لكل أب وأم حضرتك بتدعي انك عارفة المصلحة علشان تجربتك في الحياه… بس تجربتك ممكن تكون محدودة، واختياراتك ممكن تكوني مجبورة عليها.
لو جالك فرصة تكسري الجبر، لو جالك فرصة تغيري الظلم اللي وقع عليكي، لو جالك فرصة تعملي لبنتك اللي كان نفسك يتعمل ليكي، بس أقنعتي نفسك إنه مش صح، علشان الحياه يبقى ليها معنى … أعمليه، وثقي ان حكم الناس عليكم لا يتساوى مع السعادة. ياما ناس اتجوزت علشان القطر قرب يفوت، وكرهوا حياتهم.
احنا مش في محطة، مفيش قطر. البنت متولدتش علشان تقعد تستنى القطر يعدي على محطة! ديه حياه، يعني رحلة…
وزي ما بنقول … اختار الرفيق قبل الطريق، اختار الشريك، قبل الشراكة. اختار المعدن، قبل الثمن. اختار أي حاجة، لأن الحياه مش المفروض… تتعاش إجبار
محمد وديد هو مستشار زواج وعائلة حاصل على ماجستير في استشارات الصحة العقلية من كلية رود آيلاند بالولايات المتحدة الأمريكية وماجستير في الفلسفة من جامعة القاهرة ، مصر. يقدم مجموعة متنوعة من الخدمات الاستشارية.
