homesliderالسعادة وراحة البال

غيري حياتك في ٩ خطوات!

 

غيري حياتك في ٩ خطوات!

كلنا كأمهات في صراع مستمر مع الزمن وشكوتنا الأساسية هي إننا مش قادرين نكفي اللي ورانا ومش لاحقين نخلص حاجة.

أنا زيكم بالظبط بس الصراحة بشوية تغييرات بسيطة حياتي بقت أسهل و إختلفت كتير، فحاولوا تشوفوا إذا الحاجات دي هتفرق معاكوا

١- إصحي ساعة قبل البيت
أنا عارفة إنها ممكن تبان صعبة بس مع الوقت والتعود هتبقي عادية جدا و
الساعة دي هتفرق أوي معاكي ومع البيت كله.

أنا بصحي في الساعة دي بروق البيت، أجهز أكل المدرسة وألبس وممكن أشرب قهوة كمان.

٢- حاولي تبقي منظمة الصبح
يعني لبس المدرسة ولبسي يكون جاهز من بالليل وممكن أبقي كاتبة ورقة فيها أفكار لأكل المدرسة علشان مقعدش محتارة أو أضيع وقت.

اليوم اللي بيبدأ من غير لهوجة بيبقي يوم رتمه كله حلو.

٣- خطة لليوم كل يوم
أنا عايشة حياتي كلها بعمل قوائم للبيت ولشغلي وطلبات البيت ولو فيه حاجة معينة عايزة أحضرها وهكذا.

إنك تعملي لسته وتبقي معاكي وقدامك طول اليوم دا له مفعول السحر. النظام بيعمل معجزات.

٤- ترتيب كل حاجة وأي حاجة
زمان كان كتير أوي يحصل أبقي محتاجة ألبس ولادي حاجة وتبقي مختفية أو يكون عندهم حاجات أكون ناسياها وألاقيها بعد ما تكون صغرت عليهم.

إتعلمت أرتب كل هدومهم بالسن وبطريقة إن كل حاجة قدامي ومترتبة علشان أفضل فاكراها ومضيعش وقت في التدوير عليها ودي خطوة هتعمليها مرة و هتفيدك علي طول.

٥- لما تتعبي خدي راحة علشان تشحني
مش معني إننا أمهات إننا مينفعش نرتاح. خدي يوم راحة من كل حاجة وإطلبي مساعدة من جوزك أو مامتك وخلي ولادك يساعدوكي في ترويق لعبهم ومذاكرتهم وأي حاجة تخصهم.

٦- لازم يبقي عندك روتين
لو بتزهقي من الروتين تبقي غلطانة جدا. الروتين نعمة وبيوفر وقت فوق الوصف. جربيه وإدعيلي.

٧- لا تؤجلي عمل اليوم إلي الغد
زمان كانوا بيقولولنا الكلام ده عن المذاكرة وطلع عندهم حق. لو وراكي غسيل أو طبيخ أو تنضيف أو شغل إعمليه أول بأول. هيفرق أوي. خلي كل حاجة ليها وقتها وإلتزمي بالروتين وهتحسي بالفرق.

٨- بلاش الشكوي الكتير حتي بينك وبين نفسك
الشكوي الكتير هتخليكي سلبية وهتأثر علي طاقتك وهتسحب منك كتير فقلتها أحسن.

٩- نص ساعة لنفسك كل يوم
إعتبريها روشتة. متقوليش مفيش وقت، فيه بس إنتي مش واخدة بالك. نص ساعة كل يوم هتجدد طاقتك جدا. ممكن تقري، تعملي رياضة، تعملي ماسك، تعملي قهوة، المهم تعملي أي حاجة لنفسك.

Facebook Comments

ديانا فريد

ديانا هى زوجة وأم لتوأم تستمد إلهامها من الطبيعة والموسيقى وتستغل شغفها بالكتابة فى توثيق اللحظات المميزة لتلهم الآخرين، وتنشر كتاباتها فى عدد من الأماكن بمصر والخليج.
كما أنها من خلال صفحتها على الفيس بوك Twin Mummy’s Diary تتشارك مع الأمهات فى خبراتها ونصائحها المفيدة التى تكتسبها خلال رحلتها مع الأمومة المليئة بالمغامرات والتحديات.

إغلاق
إغلاق