أطباق رئيسيةوصفات لذيذة

عرق البتلو بالبابريكا

 

عرق البتلو بالبابريكا

عرق البتلو بالبابريكا

وصفة متميزة كمان… عرق البتلو بالبابريكا البابريكا من الاعشاب اللى مش واخدة حقها كتير ف المطبخ المصرى… بس لما بجرب بيها حاجات مختلفة… فعلا بتدى طعم مميز جدا… طعم زى التدخينة كدة … المهم..

المقادير:
• عرق او موزة بتلو (حوالى 2 كيلو)
• ربع كوباية بابريكا
• ربع كوباية ريحان و اوريجانو مجفف
• ملح وفلفل
• معلقة كبيرة زيت زيتون
• جزرة كبيرة مبشورة
• عود كرفس افرنجى متقطع رفيع
• بصلة كبيرة متقطعة جوانح
• بروكلى او قرنبيط
• فلفل الوان (بيخلى شكل الطبق ف الاخر يفتح النفس)
•3 وحدات طماطم متقطعة مكعبات
• ملح وفلفل
• 2 كوب شوربة لحم منزوعة الدسم (او مية لو مافيش شوربة… بس الشوربة بتخلى الطعم اغنى)
• ممكن كمان تضيفوا اى خضروات بتحبوها: بسلة- مشروم…. زى ماتحبوا

الطريقة:
• نتبل عرق البتلو بالملح والفلفل والبابريكا والاوريجانو والريحان ومعلقة زيت الزيتون..وندعكه كويس عشان يشرب التتبيلة.. ونربطه بخيط سميك اللى بيتربط بيه الرستو ونسيبه ف التلاجة حوالى ساعتين
• نسخن الفرن على 200 درجة
• نجيب صينية الفرن اللى هنسويه فيها وياريت تكون تيفال… او اى حاجة مش بتلزق وينفع تتحط على النار…
• نحط اللحمة من غير زيت على النار (هى فيها زيت) ونحمرها على كل الجوانب عشان تاخد لون..
• بعدين نضيف الخضروات (ما عدا الطماطم) ونقلبهم معاها 5 دقايق ونظبط الملح والفلفل
• بعدها نضيف الطماطم والشوربة
• اول ما يبدأ يغلى.. اشيله من على النار واغطيه بفويل وعلى الفرن على طول…
• نسيبه حوالى ساعة ونص عشان يستوى… اول ساعة يكون متغطى… وبعدين اشيل الفويل واسيبه كمان نص ساعة…
• بعدها نشيل الخيط و نحطه فى طبق التقديم الشيك.. بس لما نيجى نقطعه نستنى شوية عشان يهدى وبعدين نقطعه…

Facebook Comments

إيمان حلمي

مع انها صيدلانية… الا ان اكتر حاجة بتحبها إيمان حلمى هى انها تطبخ اكلات كتيرة من الاكلات المفضلة عندنا بطريقة تكون ماشية مع الدايت وف نفس الوقت تحافظ على الطعم الحلو… ومن ساعتها قررت تشارك الفكرة دى مع كل الناس اللى نفسهم يعملوا دايت ومايزهقوش.. من خلال اكلات جديدة ولذيذة… ودايت!

زر الذهاب إلى الأعلى