شوربات وصلصاتوصفات لذيذة

شوربة منسترونى

 

شوربة منسترونى

شوربة منسترونى

الشوربة دى بقى خفيييييييييييفة وطعمها تحفة وتعتبر وجبة كاملة لوحدها يادوب هى مع ربع فرخة مشوية وسلطة وكدة تمااام.

شوربة منسترونى …. دى شوربة إيطالية أصلا بس بجد أنا بمسك نفسى بالعافية عشان ما نساش نفسى وأنا بشربها.

المقادير (لشخصين):
• بصلة صغيرة مقطعة مكعبات
• جزرة مقطعة مكعبات
• معلقتين فاصوليا خضرا مقطعة صغير
• معلقتين بسلة
• واحدة طماطم مقطعة مكعبات
• نص عود كرفس أفرنجى متقطع رفيع ولو مافيش ممكن تستعملوا الكرفس الأخضر بس تضيفوه ف الآخر
• 4 معالق مكرونة صغيرة
•2 كوب شوربة منزوعة الدسم
• 2 كوب ماء
• معلقتين فاصوليا حمرا مسلوقة أو معلبة
• ملح وفلفل وزعتر

الطريقة:
• نحمر البصل مع نقطتين زيت لغاية مايبقى دهبى
• وبعدين ننزل عليه بالكرفس والبسلة والفاصوليا والطماطم والجزر والميه والشوربة ونسيبهم مع بعض حوالى عشر دقايق
• بعدين نضيف المكرونة ونسيبها خمس دقايق
• بعدين نضيف الفاصوليا ونسيبها كمان خمس دقايق
• نظبط الملح والفلفل والزعتر ولو حسيتوا انكوا محتاجين ميه أو شوربة أكتر ضيفوا.

خلوا بالكوا ظبطوا الملح ف الآخر عشان الخضار على مايستوى هتكون كمية الميه قلت فلو ظبطنا الملح من الآول هتتطلع حادقة..

ممكن كمان لو عايزين تبدلوا الفاصوليا الحمرا بفاصوليا بيضا اوكى أو أى خضار تانى تحبوه… بس الميزة فى الشوربة دى إن ألوانها تفتح النفس. وبجد لوحدها بتشبع أصلا.

Facebook Comments

إيمان حلمي

مع انها صيدلانية… الا ان اكتر حاجة بتحبها إيمان حلمى هى انها تطبخ اكلات كتيرة من الاكلات المفضلة عندنا بطريقة تكون ماشية مع الدايت وف نفس الوقت تحافظ على الطعم الحلو… ومن ساعتها قررت تشارك الفكرة دى مع كل الناس اللى نفسهم يعملوا دايت ومايزهقوش.. من خلال اكلات جديدة ولذيذة… ودايت!

زر الذهاب إلى الأعلى