شوربات وصلصاتوصفات لذيذة

شوربة كريمة المشروم

 

1016910_357775137682806_1790761962_n

شوربة كريمة المشروم

• فصين توم مفرومين
• كوباية مشروم فريش أو معلب (انا استخدمت فريش… بيبقى طعمه أحلى كتير فى الشوربة)
• كوبايتين شوربة منزوعة الدسم
• كوب حليب خالى الدسم
• ملح وفلفل وجوزة الطيب
• معلقة صغيرة نشا مدوبة فى معلقة حليب (انا مش بحبها تقيلة أوى… لو عايزين تتقلوها زودوا النشا)

الطريقة:
• نشوح التوم فى نقطة زيت لحد مايبقى أصفر بعدها ننزل عليه بالمشروم المقطع… ممكن اختيارى تشوحوا مع التوم كرفس افرنجى متقطع رفيع اوى اوى بجد بيدى طعم مميز جدا… بس لو مش موجود مش مشكلة.. (خلى بالكوا نقطع المشروم آخر حاجة خالص قبل مانبدأ الشوربة على طول عشان مايسودش)
• نتبل المشروم بملح وفلفل ونقلب لحد مايدبل
• ننزل عليه بالشوربة ونديله غلوة
• فى الخطوة دى بقى… فيه ناس بتحب تطحن الشوربة فى الخلاط بعدين ترجعها تانى على النار … الحركة دى فعلا بتخلى طعم المشروم أغنى وأقوى… بس انا كنت مستعجلة انهاردة ف ماعملتهاش…
• فى الحالتين… نضيف الحليب بعدها (سواء ضربنا الشوربة او لأ) وعليه النشا ونقلب لغاية ماتاخد قوام خفيف كدة
• آخر حاجة نضيف جوزة الطيب… هتلاقوا الريحة اختلفت خالص
• اللى عايز يضيف فراخ معاها نتبلها الأول بالملح والفلفل ونشوحها فبل المشروم… ولو عايزين تعملوها بالفراخ بس نشوح بصلة الأول مع التوم…
Facebook Comments

إيمان حلمي

مع انها صيدلانية… الا ان اكتر حاجة بتحبها إيمان حلمى هى انها تطبخ اكلات كتيرة من الاكلات المفضلة عندنا بطريقة تكون ماشية مع الدايت وف نفس الوقت تحافظ على الطعم الحلو… ومن ساعتها قررت تشارك الفكرة دى مع كل الناس اللى نفسهم يعملوا دايت ومايزهقوش.. من خلال اكلات جديدة ولذيذة… ودايت!

زر الذهاب إلى الأعلى