شوربات وصلصاتوصفات لذيذة

شوربة الشوفان بالخضروات

 

شوربة الشوفان بالخضروات

شوربة الشوفان بالخضروات

عشان كذا حد طلب منى وصفات شوربة لرمضان وكذا حد طلب وصفات بالشوفان… جبتلكوا شوربة الشوفان بالخضروات.  الشوربة دى على طريقة شيف حورية زنون من برنامج حورية المطبخ… انا بس شيلت منها البطاطس وقللت الزيت عشان تبقى دايت… وكل واحد ليه مطلق الحرية يضيف او يشيل اى نوع خضروات حسب مايحب…

 

المقادير: (لشخصين)

• بصلة صغيرة متقطعة صغير
• جزرة صغيرة بردو متقطعة صغير
• عود كرفس افرنجى (لو مافيش ممكن كرفس اخضر بس نضيفه ف الاخر)
• فص توم مفروم
• معلقتين ذرة حلوة حب (معلبة)
• كزبرة خضرا مفرومة
• شوربة منزوعة الدسم
• معلقتين شوفان
• ملح وفلفل
• معلقة صغيرة شمر
• بقدونس مفروم للتزيين

الطريقة:
• فى معلقة شاى زيت زيتون نحمر البصل وبعدين الكرفس وبعدين التوم
• نضيف الخضروات ونقلب تقليبة مع الملح والفلفل
• نضيف الشوربة والشمر ونسيبهم يغلوا مع بعض لغاية ما الخضار يستوى
• بعدين نضيف الشوفان ونسيبه على نار هادية لمدة 10 دقايق (بس ضيفوا الشوفان وانتوا بترشوه حبة حبة عشان مايكلكعش مرة واحدة)
• اخر حاجة نضيف الكزبرة

عليها بقى شوية ليمون وتبقى آخر مزاج

هى من مقاديرها شكل طعمها مختلف، جربوها وإن شاء الله تعجبكوا

ورمضان كريم

Facebook Comments

إيمان حلمي

مع انها صيدلانية… الا ان اكتر حاجة بتحبها إيمان حلمى هى انها تطبخ اكلات كتيرة من الاكلات المفضلة عندنا بطريقة تكون ماشية مع الدايت وف نفس الوقت تحافظ على الطعم الحلو… ومن ساعتها قررت تشارك الفكرة دى مع كل الناس اللى نفسهم يعملوا دايت ومايزهقوش.. من خلال اكلات جديدة ولذيذة… ودايت!

زر الذهاب إلى الأعلى