السعادة وراحة البالالصحة العامةالمرأة العاملة

جوع اخر الليل

 

جوع اخر الليل

طبعا ناس كتير عارفة أنا أقصد ايه.. أنا بتكلم عن القوة الخفية اللي بتنشط في الساعات المتأخرة من الليل وتدفعك لفتح باب التلاجة وطبعا فتحة باب التلاجة دي بتبقي بدايه لحالة النهم الليلى.

حالة النهم الليلى بتخليكي تاكلي اللي قدامك علي طريقة ” سمك/لبن/تمرهندي” يعنى تاكلي حلو علي حادق أو محشي بعد مربي يعنى حاجات عشوائية وغير منطقية لا بالنسبة للوقت ولا للكمية.

?حالة الجوع أو النهم الليلي دي ليها شوية مواصفات:

إنها تبقي مستعجلة ..يعني مفيش صبر حتي للتفكير هتاكلى ايه

بتحسى بحالة جوع مع خنقة كده..جوع من زورك مع عصبية

بتاكلي من غير ترتيب ولا تخطيط..ومش بتبطلي أكل إلا لما الأكل يخلص وساعتها بس بتحسي بتأنيب ضمير ولوم لنفسك علي اللي حصل

طيب الحالة دي سببها إيه؟

مبدئيا اعرفي إن لو اللي دفعك لفتح باب التلاجة إحساسك إنك بتعملي حاجة لنفسك بعد يوم شاق أو تنفيس عن توترك من دوشة العيال طول الْيَوْمَ أو زعلك من جوزك علشان نسي عيد جوازكم أو سوء تفاهم مع حماتك أو حرقة دم من أصحابك أو إحباطك من مديرك في الشغل أو ندم انك سيبتي شغلك وقعدتي في البيت أحب أقولك إن فتحك لباب التلاجة مش هو الحل  بالعكس ده هيزود الطين بلة.

.الأفضل إنك تفكري في حل عملي وواقعي لمشكلتك بدل الهروب منها بالأكل لأن كده انتي بس بتشوشي علي عقلك لفترة بسيطة وقت الأكل وده مش حل

لو حالة الجوع الليلي دي نتيجة لانك نسيتي تاكلي طول الْيَوْمَ وانشغلتي بالولاد وتمارينهم وشغل البيت يبقى دايما خلي معاكي في شنتطك علبة تمر- بار جرانولا – تفاحة للسناك واتغدي مع الولاد وما تكسليش.

لو مش قادرة تنامي وحتة التورتة ولا الكريم كراميل بايتة في التلاجة كليها بالنهار واخلصي منها ..ما تتردديش كتير المهم ما تنسيش التزاحم.

لو السهر هو اللي بيدخلك في الحالة دي قللي شرب الكافيين خلال النهار وتجنبيه تماما بعد المغرب.

.حاولي تاخدي راحة من الموبايل والأجهزة فترة كافية قبل النوم وقللي التوتر بعمل تمارين تنفس للاسترخاء

أبحاث كتير اتعملت علي موضوع النهم الليلي ده وأثبتت ارتباطه بالحالة النفسية وعلشان كده حاولى دايما توجدي البهجة في حياتك واستمتعي ببساطة الأشياء وحافظي علي نفسيتك لأنها محددة لحالتك الصحية ولتوازن حياتك

Facebook Comments

هبه أنور

Heba Anwar, a mother of three, is a holistic health coach who studied nutrition and coaching at The Institute for Integrative Nutrition. She is the founder of Smart Food by Heba Anwar. She aims to raise awareness on the impact of food on health and the general wellbeing of all humans through creating a culture of finding alternatives. Her wish is to empower every mother with the tools and knowledge needed to offer better food choices for her children. Heba offers awareness courses and transformational coaching programs for women to help them reach their best selves, understand their bodies and identify what foods work best for them.

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى
إغلاق
إغلاق