homesliderالحملفترة الحمل

تورّم القدمين أُثناء الحمل

 

 

تورّم القدمين أُثناء الحمل

 

س. أنا حامل ورجلي وارمة واتنفخت ومش قادرة حتى البس الحذاء بتاعى هل دا طبيعي؟

تورّم القدمين خلال فترة الحمل بيحصل عند غالبيّة الحوامل في أيّ وقت خلال فترة الحمل، ولكنّه بيزيد كل ما نقرب ناحية معاد الولادة.
ودا ممكن يكون طبيعي في معظم الحالات ولكن أيضا ممكن تكون له بعض الأسباب المرضية
والسبب في معظم الحالات بيعود لزيادة حجم الرّحم الّلى بيزود الضّغط على الأوعية الدمويّة في منطقة الحوض وبالتالى بيأثر على الدورة الدموية في الرجلين وبالتالى بتتورم القدمين بالإضافة الى ان التغيرات الهرمونيّة والفسيولوجيّة في الحمل بتؤدي لاحتباس السوائل في الجسم بشكل طبيعي.

– كمان فيه أسباب مرضية بتؤدى اانتفاخ القدمين وتورّمهم زى أمراض القلب، وأمراض الكلى، وأمراض الكبد، وتسمم الحمل ودا بيتطلب متابعة حالتك الصحية مع الطبيب وضغط الدم والزلال في البول.

وفي أسباب تانية بتزود من التورم زى:
-الوقوف لفتراتٍ طويلة.
– تناول الأطعمة المالحة بكثرة.
-الوزن الزائد للحامل أكتر من الوزن المسموح بيه.

*وأخيرا مفروض تعملي الحاجات دى علي قد ماتقدري علشان تقللي التورم:

•لازم تشربي ميه كتير(٢-٣ لتر يوميا) و قللي الأملاح في الأكل زي المخلل.
•كلي بروتين يومياً لأن قلة البروتين بتزود التورم.
•بلاش الوقوف كتير ولو مضطرة حركي رجلك بخطوة في المكان كل شوية ولو قاعدة ارفعي رجلك لفوق علي أي كرسي أو حركي مشط القدم لقدام كل شوية.
-استشيرى طبيبك لممارسة بعض التمارين اللى بتخفف من ضغط الرحم على الأوعية الدموية وبالتالى بتخفف التورم.
– المساج المتخصص بيساعد على التقليل من التورم.
– الرباط ( كاينسيولوجي) أو حزام الحمل المتخصص للحوامل بيقلل من ضغط الرحم على أوعية الحوض.

Facebook Comments

د. هناء محمد أبو القاسم

استشارى النساء والتوليد – مركز الأسكندرية الإقليمى لصحة وتنمية المرأة

إغلاق
إغلاق