إدارة وتنظيم البيتالأمومةالسعادة وراحة البالالمرأة العاملة

تنظيم الوقت بيسهل حياتك

 

تنظيم الوقت بيسهل حياتك

علشان مايبقاش دا شكلك كل يوم فيه شوية حاجات ممكن تعمليها تساعدك. دي حاجات فرقت معايا أنا شخصيا فقولت يمكن تساعدكم:

بحط خطة لأكل الأسبوع، عارفة أنا عندي إيه ومحتاجة إيه وبطبخ معظم الوقت بليل علشان الصبح أكون فاضية لمشاويري وشغلي وطلبات البيت

بالتالي فيه لستة لحاجات البيت الناقصة اللي محتاجاها للأكل دا أو للبيت عموما.  بنزل نزلتين في الأسبوع لطلبات البيت علشان أقسم و علشان فيه حاجات بجيبها من أماكن وحاجات من أماكن تانية

لبس المدرسة بحضره من بليل لأني كنت قبل كده الصبح أكتشف إن فيه حاجة أنا محتاجاها دلوقتى وفي الغسيل أو محتاجة مكواة. دلوقتي كل يوم بعد ما الولاد يناموا أطلع لبس اليوم اللي بعده وأتأكد إن كل حاجة موجودة

أي حاجة ممكن أطبخها وينفع تتشال في الفريزر بعمل منها بزيادة علشان يوم أكون أنا مزنوقة فيه، يعني مثلا هتبل فراخ يبقي أتبل إتنين أطبخ واحدة وأشيل واحدة. هعمل مكرونة أعمل بزيادة وأشيل صينية مكرونة بالبشاميل في الفريزر. هطبخ خضار أحضر ضعف الكمية وأشيل نصها علشان في الأيام الصعبة دايما يكون فية أكل مطبوخ جاهز

من فضلكم حاولوا تبعدوا عن الأكل الجاهز أو النص مطهي المجمد لأن الأبحاث أثبتت إن الأكل دا مليان مواد مسرطنة. صدقيني لو جبتي كيلو لحمة مفرومة و حضرتي برجر بيتي هتدعيلي 🙂 نضيف و عارفة مصدر اللحمة ومغذي وصحي. بشوية سلطة وعيش حلو هتبقي كأنك أكلتي الولاد برة.

الغسيل ينطبق عليه مقولة (لا تؤجل عمل اليوم إلي الغد) الغسيل بيتكاثر وبيزيد بسرعة شنيعة فإتعودي إن الغسيل يكون له نظام وعدد غسلات ثابت علشان لما الحاجة بيبقي ليها جدول ونظام بتمشي أحسن

لازم كل يوم في الأسبوع يكون فية أولوية، ماينفعش كل يوم نعمل كل حاجة. يعني في أيام لازم مذاكرة، أيام تمارين النادي، أيام مشاوير، أيام تنضيف. الدنيا تمشي كدة أحسن. ممكن تحطي خطة الأسبوع قدامك علشان تمشي عليها لحد ما تحسي أنها بقت أسلوب حياة

حاولي ترتبي المطبخ وتروقيه بإستمرار علشان دا هيساعدك ويديكي أفكار أكل وتعرفي عندك إيه ومحتاجة إيه فماتجيبيش حاجة إنتي مش محتاجاها. الموضوع دا فرق معايا في المصاريف، كنت كتير جدا أجيب حاجات عندي علشان مش دريانة إنها موجودة.

نفس القصة بالظبط للهدوم (بالذات الولاد) دايما من زحمة اليوم الحاجات بتتلخبط ونظامها بيضيع وتبقي عندي الحاجة ومش لاقياها وأنزل أشتريها. أنا نزلت إشتريت علب حلوة جدا قماش بسوستة بتحافظ علي نضافة وترتيب الهدوم جوا الدواليب.

أخيرا و بالنسبة ليا أهم حاجة ماتنسيش وسط كل دا وقتك اللي بتاعك اللي هتشحني بيه طاقتك وتقدري تبقي أم أحسن كل يوم. إنزلي إشربي حاجة في مكان بتحبيه، إقعدي مع حد بتحبيه قعدة حلوة، إقري كتاب، إرسمي، إسمعي مزيكا، إعملي رياضة… عندك حاجات كتير جدا ممكن تساعدك تبقي أحسن كل يوم

Facebook Comments

ديانا فريد

Diana is a wife and a mother of twin babies who is inspired by music, nature and daily life interactions. She uses her passion for writing to capture special moments, replace pain with laughter, and inspire others. She is a feature writer for several publications in Egypt and the Gulf; through her Twin Mummy’s Diary she shares her thoughts, experiences and helpful tips as she goes us through the roller coaster ride called motherhood, with its challenges and joys.

زر الذهاب إلى الأعلى
إغلاق
إغلاق