الولادةيوميات ماما

تفاصيل يوم الولادة

 

تفاصيل يوم الولادة

تفاصيل يوم الولادة

يوميات ماما #٢

يوم الولادة كان يوم غريب جداً.. كان من المفترض إنى أولد بعملية قيصرية فى أحد أيام الأربعاء ونزلت فعلا اتفقت مع المستشفى على الدخول يوم الأربعاء الصبح.. يوم الأحد بليل كنت حاسة إنى مش مظبوطة، كنت منهكة جداً وعندى شوية غثيان مش عارفة سببه، دخلت أنام شوية وصحيت  قبل الفجر  وأنا حاسة بألم رهيب فى بطنى.. بدأ يبقى فيه طلق خفيف، وده فى حد ذاته مش مقلق فى حاجة لأنه فى الشهر التاسع الطلق بيزيد عن الشهر السابع والثامن بشكل طبيعى، على الساعة 6 صباحا بدأ الألم يزيد وحسيت إنى غالباً هولد النهاردة.. الست اللى ولدت قبل كده بيبقى عندها إحساس إنه فى حاجة مش مظبوطة وبتبقى حاسة إنها هتولد خلاص..

وعموما هقول لك نصيحة واحدة مجربة عشان تعرفى تتعاملى مع ألم الولادة فى البيت

غالباً فى الشهر التاسع بيكون فيه حاجة اسمها “طلق الولادة الكاذب” وده بيكون ألم يشبه آلام الولادة لكنه مش بيؤدى لولادة فى نفس اليوم. كتير من الستات بيفتكروا إنهم بيولدوا فعلا وبيروحوا عند الدكتور والدكتور بيكتب لهم مسكن ويرجعهم البيت تانى.
أحيانا اضطرابات القولون بتسبب كمان آلام تشبه آلام الولادة أو بمعنى أصح بتسبب انقباضات أقوى فى الرحم نتيجة ضغط القولون على الجنين وده بيتسبب فى حركته بشكل قوى وملحوظ فتأكدى إن ألمك مش سببه انتفاخ أو اضطراب فى القولون نتيجة أكل معين أكلتيه.

كمان لو إنت فى ولادة ممكن تحسى ببعض الغثيان وهتحسى إنك كل شوية عايزة تدخلى الحمام للتبرز وبيبقى إحساس كاذب، المهم لو حسيتى الإحساس ده وزاد قوى خلى بالك ما تقعديش على التواليت لفترة طويلة، أجلى دخول الحمام لأنك – ومن غير مبالغة – ممكن تولدى وإنت قاعدة على التواليت لو عنق الرحم كان مفتوح، والموقف ده حصل لواحدة صاحبتى فعلا وكانت دربكة جامدة جداً (الحمد الله هى والبيبى كويسيين دلوقتى).

الضرورى كمان إنك تحسبى موعد الطلق على الساعة.. لو بقى الفرق بين كل طلقة والتانية حوالى عشر دقائق أو ربع ساعة وزادت مدة الطلقة نفسها لدقيقة ده معناها كمان إنك محتاجة تروحى المستشفى.

نرجع لحكايتنا..

المهم فضل الألم يزيد ويزيد لحد ما أصبح غير محتمل. بحلول الظهر كلمت الدكتورة وقولتلها تيجى المستشفى فوراً والحمد لله إنى وصلت المستشفى فى الوقت المناسب لأنى كنت دخلت فى ولادة بالفعل وكان عنق الرحم مغلق تماما مما استلزم عملية قيصرية ولو كنت أتأخرت أكتر من كدة شوية كان ممكن يحصل مشكلة للأطفال نتيجة هبوط مشيمتى قبل وقت الولادة.

الظريف ف ولادتى إنى كنت متحمسة قوى عكس المرة الأولى، متحمسة لأنى مش قلقانة نتيجة فهمى للولادة بشكل أكبر ومتحمسة عشان الولاد اللى جايين للدنيا، ومتحمسة أكتر إنى هتخلص من الوزن الكبير اللى كنت شايلاه جوا بطنى. أكتر حاجة ضحّكت أصحابى إنى كتبت على فيس بوك إنى داخلة غرفة العمليات حالا وبعد أربع ساعات بالظبط لما فقت من البنج دخلت من على موبايلى وكتبت إنى ولدت وده كان شىء ظريف جداً مش عارفة عملته إزاى ساعتها.

الفوقان من البنج لحظة مهمة جداً بتحسى فيها إنك فى عالم تانى ودايماً بتقولى اللى ف قلبك وبتقولى كلام حقيقى من غير مجاملات.. يعنى أنا كنت ببص لكل واحد وأقوله يا فلان سامحنى لو كنت زعلتك ف يوم، ومسكت إيد جوزى وقلت له خلى بالك منى ومن الأولاد.

وقلت كمان وأنا بفوق من البنج  إنى مش عايزة أشوف الأولاد دلوقتى لأنى لو شفتهم هفتكر الوجع إللى أنا فيه.. معرفش قلت كده إزاى.. مش قلت لكم بنقول الكلام من غير تزويق .

تحضير شنطة الولادة شىء مهم جداً لأن الواحدة مش بتبقى عارف معاد ولادتها بالظبط.. أى ولادة حتى لو كانت محددة بمعاد ممكن لأى ظرف تتم قبل معادها، عشان كده يستحسن تكونى محضرة الشنطة من الشهر السابع لأن أى حاجة ناقصة فى الشنطة ممكن تعمل دربكة فى المستشفى لأنه مش بيكون فيها غير صيدلية بس.

 ودى لستة الطلبات اللى هتساعدك تحضرى شنطة الولادة:

1-فستان قطنى مريح تلبسيه بعد الولادة فى المستشفى. وياريت تتجنبى البنطلونات لأن مش هتقدرى تلبسيها نتيجة لصعوبة حركتك فى البداية.

2-غيارات داخلية مريحة وقطنية.

3-فوط صحية.

4-فرشاة أسنان ومعجون وفرشاة شعر وكولونيا.

5-شبشب مريح وبسيط.

6-طرحة قطن خفيفة لو كنت محجبة عشان تلبسيها لما الناس تزورك ف المستشفى.

7-كاميرا طبعاً عشان تصورى البيبى وراعى إنها تكون مشحونة.

8- أى حاجة بتساعدك على النوم وبتخليكى مش متوترة زى سيديهات القرآن الكريم أو سيديهات الموسيقى، كتب، نوع حلويات بتحبيه.

9-حفاضات للبيبى.

10-كوفرتة قطن أو بطانية على حسب موعد ولادتك.

11-فانلات داخلية وبنطلونات قطنية خفيفة داخلية للبيبى لو كنتى فى الشتاء.

12-بافتات.

13-شامبو وفرشاه للبيبى وشاور جيل واسفنجة استحمام للبيبى.

14-تيتينة، فى حالة لو كنتى حابة إنك تستخدميها مع طفلك.

15-مناديل مبللة لتغيير الحفاضة.

16-Carry Cot

17-Laundry Bag كيس فارغ للملابس المتسخة.

18-موبايلك والشاحن بتاعه.

19-شيكولاتة تقدمى منها لزوارك فى المستشفى.

 دى أهم الحاجات وأكيد كل واحدة بيبقى عندها حاجات ممكن تحتاجها..المهم ما تنسيش تحضرى الشنطة من بدرى.

خلصت كلامى النهاردة..أشوفكم قريب يا  ماميز.

 


 *هذه المقالات تعكس وجهة نظر الكاتبة وهدفها نقل الخبرات الشخصية مع الأمومة. ننصح كل أم أن تأخذ ما يناسبها فقط وتستشير طبيبها الخاص فى الأمور الطبية.

Facebook Comments

شيماء الجمال

شيماء الجمال كاتبة ومدونة في مجال الأمومة ، ومؤسسة Ana7amel.net . يمكن الاتصال بها على info@ana7amel.net .

زر الذهاب إلى الأعلى