يوميات ماما

تعيش وزارة الصحة المصرية

 

bottle

تعيش وزارة الصحة المصرية

 

دكتور الأطفال كتب لى من أول يوم بعد ولادتى على لبن صناعى علشان التوأم بجانب الرضاعة الطبيعية. بس كان مطلوب منى في الأول إنى أبذل مجهود محترم مع الأولاد في الرضاعة الطبيعية وأحاول أخليها عادة عندهم عشان ما يبطلوهاش. وبالفعل أول ١٠ أيام تقريبًا كنت برضّع الأولاد طبيعى بس، خصوصًا وإن المواليد الجداد في الأول بيرضعوا كمية قليلة جدًا غالبًا.

قعدت مرة كدة فـ قعدة من إياهم أحسب تكاليف اللبن الصناعى اللى بشتريه للأولاد عشان أعرف أظبّط ميزانيتى، لقيته مبلغ مش قليل.. كان ساعة ولادتهم حوالى ٢٥٠ جنيه شهريًا، وكانت الجرعة قليلة جدًا مما يدل على إن المبلغ كان هيتضاعف في خلال شهرين على الأكثر.

المهم كنت مرة قاعدة بحكى مع جدتى وبقولها مصاريف التوأم كثيرة يا تيتة، فقالت لى أشوف اللبن بتاع وزارة الصحة. وزارة الصحة بتبيع لبن مدعم فى الصيدليات قربيتنا مش عارف مين بتشتريه. قلت لها إنى مش هجيب لأولادى لبن أى كلام قالتلى شوفى بس النظام إيه ومش هتخسرى حاجة.

ولأنى حفيدة بتسمع الكلام رُحت الصيدلية تانى يوم وطلبت أشوف نماذج من أنواع اللبن المدعم، وعرفت إن وزارة الصحة بتدعم ثلاث أنواع من اللبن. وطلبت الأنواع المدعمة دى عشان أشوفها، وفعلا نقلت أسامى الألبان وفتحت حبيبى وصديقى جوجل وقرأت كل حاجة عن الأنواع دى. طلعت كلها مستوردة ونفس تركيبات الأنواع الغالية المتعارف عليها الفرق بس إن سعرها ١٧-١٨ جنيه للعلبة وده طبعا أقل بشوية من نصف تمن الأنواع التانية.

استشرت الدكتور وقال تمام وجربت أحد أنواع اللبن بتاع الوزارة والحمد لله الولاد حبوه ومكنش فيه أى مشاكل.

لو ظروفك اضطرتك تشرّبي طفلك رضعة صناعى مفيش مشكلة، أهم حاجة ما تنسيش الرضاعة الطبيعية وتحرصى عليها وما تكرريش رضعتين ببرونة ورا بعض إلا للضرورة القصوى.

 نصيحة ماما

*لما تعوزى تغيرى نوع اللبن الصناعى لطفلك لأى سبب ما ينفعش تغيريه فجأة، لأن الحركة دي ممكن تسبب الإسهال. فى الحالة دى بتقدمى ٣/٤ الرضعة باللبن اللى متعود عليه، وربع الكمية من اللبن الجديد وتفضلى تقللى القديم وتزودى الجديد واحدة واحدة لحد ما الرضعة كلها تبقى من اللبن الجديد، والعملية دى ممكن تاخد من إسبوع لعشرة أيام مثلاً.

*اللبن البقري ممنوع للأطفال أقل من عام واحد عشان إنزيمات المعدة المسئولة عن هضمه مش بتكون لسة بكفائتها وبالتالى ممكن يسبب مشاكل للبيبى.

*هذه المقالات تعكس وجهة نظر الكاتبة وهدفها نقل الخبرات الشخصية مع الأمومة. ننصح كل أم أن تأخذ ما يناسبها فقط وتستشير طبيبها الخاص فى الأمور الطبية.

Facebook Comments

شيماء الجمال

شيماء الجمال كاتبة ومدونة فى مجال الأم والطفل ومؤسسة موقع أنا حامل. للتواصل معها يمكنكم مراسلتها على info@ana7amel.net.

إغلاق
إغلاق