تجربة الولادة
الولادة أقوى تجربة ممكن تمر ببها المرأة سواء طبيعية أو قيصرية الولادة هي الولادة.
احساس الأمومة بيعمل تغيير شامل في حياتك وبيخلى الحب والعطاء والمسؤولية متجمعين مع بعض.
ومع إن دايما الولادة حدث سعيد ورائع في حياة كل أسرة علشان فرحانين بالضيف الجديد لكن مش كل أم بتكون سعيدة من جواها بتجربة الولادة.
فيه أمهات بتكون تجربتها مخيفة أو مؤلمة وحزينة وأحيانا بتكون صادمة وغير متوقعة.
ولأن الأم بعد الولادة بتكون حساسة جدا جدا لكل حاجة حواليها ولأن كل إللي حوالين الأم بيحاول يساعد بشكل ما بس دا أحيانا بيكون بشكل خاطئ لأنهم مش بيكونوا فاهمين سيكولوجية الأم.
خلينا نشرح للي حواليكي اللي قريبين منك ازاى يساعدوكي وإزاى يتعاملوا معاكي.
في الأول لازم نعرف ونفهم إن الاحساس بالألم وعدم الرضا ناحية الولادة دي حاجة شخصية جدا ولازم نحترم شعور الأم ( أيا كانت وجهة نظرنا) الفكرة اللي لازم نفهمها هي احترام شعورها وتقديره يعني مش مهم رأينا المهم هى حاسة بإيه.
علشان كدا حنقولكم شوية نصائح :
١. بلاش الحكم على تجربتها أبدا يعني بلاش نقولها عبارات زي احمدي ربنا الحمد لله إنك كويسة والبيبي كويس.
هى عارفة دا كويس ولو عندها الاختيار حتعمل كدا ألف مرة علشان تبقى هي والبيبي كويسين ولكن دا بالنسبة ليها لا يعني إن تجربتها مش مؤلمة افتكروا دايما ان الكلام اللي زى دا بيحسسها أكتر بالألم والانعزال.
٢. بلاش كمان عبارات اللوم بأي شكل من الأشكال أو يتقال لها مثلا
-لو كنتي عملتي كذا.
– ياريت كنا روحنا للدكتور الفلاني.
– مش قولتلك كذا.
هى مش مستعدة للكلام دا خااالص.
حاولوا تسمعوا ليها وخلوها تلاقي الحضن لأن مجرد انها تتكلم و تحكى وتلاقى مستمع جيد دا هيساعدها كتير.
قولولها دايما
إحنا جنبك لو احتاجتى حاجة.
انتي مش لوحدك
أنا حاسة بيكي.
Facebook Comments
استشارى النساء والتوليد – مركز الأسكندرية الإقليمى لصحة وتنمية المرأة
