الأمومة

بحبك يا أمى ٣٦٥ يوم فى السنة

 

505ede91-9be9-4bdc-8cd5-d0955d865d26

بحبك يا أمى ٣٦٥ يوم فى السنة

 

أول ما يهل علينا شهر مارس، نفتكر عيد الأم وكأن فجأة أصبح لها دور ووجود فى حياتنا مكناش واخدين بالنا منه طول السنة.

يبدأ الأولاد يجروا ويفكروا، هنجيب إيه لماما وتيتة وحماتى وخالتى أو عمتى اللى ربتنى وطنط نونة جارتنا اللى ربتنا مع مامتنا ومدرسات المدرسة!!!!

ويبدأ كل إبن وإبنة  يفكروا فى عبء الاختيار والتجديد فى الهدايا اللى لازم تكون مختلفة ومناسبة من ناحية السعر والشكل والذوق والاحتياج لها.

المحلات كلها بتكتب كلمات الحب والخصومات والأغانى لجذب المشترين.

لو حد فكر ينزل يوم ٢٠ مارس لمحلات الملابس والأجهزة والهدايا زحام شديد من مشترين اللحظات الأخيرة!!!

إحساس جميل إننا نحتفل بأمهاتنا ونهاديهم ونتجمع كلنا على إحساس واحد، فرحة وبلالين وورد، ليلة وكأنها ألف ليلة، هى فيها عروسة وملكة متوجة.

بس أول ما يطلع نهار ٢٢ مارس نلاقى نفس الأم رجعت لدايرة الطلبات والمهام أو الوحدة لو أولادها كبار ولهم حياتهم.

ما يكونش أدامها إلا انها تسترجع ذكريات يوم الاحتفال وتستنى السنة اللى جاية عشان تسمع كلمة شكرا أو بحبك يا ماما يا غالية.

اللى أى أم محتاجاه من أولادها إنها تحس بطاقة الحب دى طول السنة، لأنها زى الوردة اللى ما ينفعش تفضل عايشة ونضرة من مرة واحدة فقط فى السنة  ترويها بحب وعناية .

وعشان تقدر تتحمل تحديات كل يوم فى دراسة ومهام وعمل يومى ورعاية ومتابعة أو وحدة بعد تعب السنين

تعبيرنا لأمهاتنا عن حبنا ممكن يكون يومى وبسيط بس تأثيره على نفسيتها وطاقتها وسعادتها كبير.

مرة نساعدها فى  البيت، هدية بسيطة ولو وردة، خروجة مفاجئة، نعمل لها أكلة بتحبها، نشترى لها حاجة مرتبطة بهواية ليها.

كل يوم كلمة حلوة “إنتى الخير والبركة”، وحشتينى”، “بحبك”، “شكرا” بعد كل حاجة بتقدمها، “تسلم إيدك يا أمى” بعد كل أكلة ووجبة بتعملها، “تعبتك معايا” بعد كل مشوار أو مهمة بتعملها لينا.

حبنا لأمهاتنا مش يوم فى السنة!!

محتاجين نحسسها ونقولها بطرق كتيرة إننا بنحبها ٣٦٥ يوم فى السنة.

 

Facebook Comments

ريهام سمير

Riham Samir is a professional consultant in learning and personal skills development. Riham is a certified specialist in Dyslexia from Blackford Center – London and a member in British Dyslexia Association. She is a Certified Classroom Positive Discipline Educator from The International Association of Positive Discipline in USA, a Certified TEFL English facilitator and Certified NLP practitioner from The American Board of NLP. Riham applies the most advanced learning and tutoring techniques serving several types of clients from different ages and educational systems.

إغلاق
إغلاق