الولادةيوميات ماما

الولادة.. تهذيب وتأديب وإصلاح

 

الولادة.. تهذيب وتأديب وإصلاح

الولادة.. تهذيب وتأديب وإصلاح

يوميات ماما #٣

رغم إنى عايزة أتجنب الحديث عن أى حاجة سلبية وسخيفة فى اليوميات دى، لكن الكلام عن أول إسبوع بعد الولادة مهم وضرورى، ومش من المنطقى إنى أقولك إنه إسبوع سهل ولذيذ وجميل لإنى هكون بكذب وبضحك عليكى..عشان كدة خلينا واقعيين شوية وخلينى أحكليك عن تفاصيل أيامى الأولى بعد الولادة..

على عكس أمهات كتير قررت إنى أمشى من المستشفى بسرعة وأروح البيت عشان كدة مشيت تانى يوم الصبح..جو المستشفيات مقبض وسخيف بالنسبالى وأنا ما بحبوش وبعدين طول ما إنت فى المستشفى بتفكرى يا ترى هيعملوا إيه تانى..هيحطوا كانيولا؟ هيشيلوا الكانيولا؟ هيطهروا الجرح؟ هيدونى حقنة ..إلخ.  عشان كدة بمجرد ما إتأكدت من الدكتور إن حالتى مستقرة مشيت ونفدت بجلدى من الجو الرخم ده!

ولادة التوأم زى ما قلت لك قبل كدة كانت قيصرية، وبالنسبالى كان ألم ما بعد الولادة المرة دى محتمل أكثر من الولادة الطبيعية الأولى، لكن ده مش مقياس أبداً بالنسبالك ومفيش مقياس أو قاعدة ثابثة فى الولادة وألم ما بعد الولادة..السؤال الوجودى اللى كل واحدة من صاحباتى تشوفنى تسألهولى: القيصرى أسهل ولا الطبيعى؟ الإجابة إن كل له مميزاته وعيوبه فى إحساس الألم وفى تأثيره على جسمك فيما بعد..

فى الولادة الطبيعية حسيت بآلام الطلق أو آلام المخاض زى ما بيقولوا بشكل كبير، خصوصا إن ولادتى الأولى كانت بطلق صناعى وده بيوجع أكتر بالنسبة لأغلب الستات من الطلق الطبيعى، فى القيصرى مفيش ده طبعا.. لأنى أخدت حقنة بنج وشكرا، سافرت بعيد وما فوقتش  غير بعد الولادة. بس كتير من صاحباتى قالولى إنهم أخدوا حقنة الظهر Epidural وما حسوش بأى وجع خالص لا وقت الطلق ولا وقت الولادة نفسها، لكن أنا بصراحة رفضت آخدها لما الدكتورة عرضت عليا وخفت منها..يعنى إيه أبقى شايفة وسامعة كل التفاصيل دى؟  دكاترة.. وممرضات.. وتوتر.. وحقن.. وخيط.. ودم! ده شىء بالنسبالى كان صعب جداً لإنى بتوتر وقلبى خفيف.. يارتنى كنت أقدر أتحمل أولد بحقنة الظهر..صاحبتى حكت لى إزاى قعدت تعيط من الفرحة وهى شايفة البيبى بيخرج من بطنها ..حاجة بجد مؤثرة وعظيمة قوى إن الأم تقدر تشوف إبنها وهوبيخرج من بطنها قدام عنيها ومن غير ألم.

في ولادتى الطبيعية الأولى  كنت منزعجة جدا وقت دخول الحمام  بسبب الخياطة وده انعدم تقريبا  فى ولادتى التانية اللى الخياطة فيها كانت  فى أسفل البطن.

فى ولادتى الأولى كمان  قدرت أقوم وأنام على جنبى فوراً وكنت بقدر أوطى وأشيل  أى حاجة بسهولة أما فى الولادة القيصرية فكل حاجة أخدت وقتها وكنت ممنوعة من شيل أى حاجة تقيلة بسبب الخياطة زى مالدكتورة طلبت منى.

شخصياً حسيت فى أول إسبوع بعد الولادة وكأنيى طفل مولود بيكبر يوم بعد يوم وبيتطور يوم بعد يوم..وبجد سبحان الله إن الأم بترجع لطبيعتها تانى بكل كل الدغدغة دى! أنا بعد ما فقت من البنج بكذا ساعة بالعافية عرفت أقوم من على السرير وكان لازم ماما ومحمد –جوزى- يسندونى، أول مرة حطيت رجلى على الأرض حسيت إنها “مش شايلانى”  زى ما بنقول، مكنتش عارفة أمشى مترين على بعض لوحدى، مكنتش بعرف أقعد أو أقوم من على التواليت لوحدى، أما النوم فده كان أزمة لوحده فضلت إسبوع كامل مش عارفة أنزل من على السرير لوحدى وكنت لازم أخلى الباب مفتوح عليا وأنا نايمة عشان أعرف أنادى على أى حد يقومنى من على السرير لما أصحى، وفضلت حوالى عشر أيام عشان أعرف أنام على جنبى أو حتى أتقلب فى السرير…أول مرة نزلت فيها أتمشى كانت بعد إسبوعين روحت مول عشان أشترى لبس جديد وبعد عشر دقائق مشى حسيت بإنهاك شديد جداً وكأنى جريت خمسة كيلو!

أنا ليه بقول كل التفاصيل دى؟ عايزاكى لما  تقرى الكلام ده كله – لو كنتى حاسة بشوية ألم – تعرفى إنك فى وضع طبيعى وتعرفى إنه ده العادى وإنه كلها أسابيع وترجعى لطبيعتك، أهم حاجة ما تستسلميش للألم وللإحباط..حاولى تستمتعى بكل لحظة إنتى عايشاها..اعرفى إن كل لحظة ألم بتعدى عليكى بتزيدك قوة وبتزيدك صلابة وقوة تحمل والأهم من ده بتزود حسناتك عند ربنا..تقربى من الله وادعيه يخفف ألم ويصبرك ويجعله فى ميزان حسناتك.

فيه شوية حاجات حصلت لى خوفتنى من احتمال إنى أكون مصابة بإكتئاب أو اضطراب ما بعد الولادة Postpartum depression زى مثلا إنى كنت بحس إن جرح العملية هيتلوث وهيحصلى مضاعفات، أو إن حد من الأولاد هيجراله حاجة..كنت لما بشيلهم بتخيل انهم هيقعوا  منى على الأرض  ووصل الأمر إنى كنت بشوف هلاوس بصرية للدم الأحمر على الأرض، كنت بصحى كل شوية مفزوعة عشان أطمن عليهم بدون أى سبب منطقي للخضة. كنت بعيط من غير سبب بعد ما أكون مبسوطة وبضحك.. لكن الحمد لله الموضوع ما زادش عن كدة وما طولش معايا وتغلبت على الامر بفضل الله أولا وبفضل روحى المتفاءلة ثانياً. الأعراض دى ما تطمنش وتدعو للقلق  لو زادت، ولو حصلت لك حاولى تفرفشى وتتغلبى عليها. بس لو طولت أكتر من إسبوعين تلاتة نصيحة منى شوفى دكتور يحل لك المشكلة دى لأنها صعبة قوى وممكن تدخلك فى إكتئاب حقيقى.

 هقولك على شوية حاجات عملتهم عشان أتغلب على احباط ما بعد الولادة:

-كنت بصور ولادى كتير قوى فى كل المناسبات وشغلت نفسى بحفظ الصور وترتيبها..التصوير بيحسسنى إنى بعمل لأولادى تاريخ.

-كنت بسمع قرآن كتير أنا والأطفال ولما كنت ببقى قاعدة معاهم لوحدنا كنت بغنيلهم الأغانى اللى بحبها.

-غالباً ماما كانت بتعمل شغل البيت وكنت متفرغة للبيبهات تماما وقاعدة طول الليل لوحدى بيهم..

وساعتها كنت بفتح يوتيوب وأتفرج على حاجات كتير قوى، مثلا  اتفرجت على أربعين حلقة من مسلسل حريم السلطان ف أول إسبوعين بعد الولادة.. طول ما أنا برضع التوأم وبظبط هدومهم وبنضف ببروناتهم قاعدة بتفرج..وقت متعة مجانى استفدت بيه!

-كنت بستمتع أول إسبوعين بإن كل ما حد يشوفنى يقولى كلى والكل عمال يجيبلى الأكل اللى أنا بحبه.

-انضميت لصفحات الأمهات والمنتديات على الإنترنت وبقى ليا صاحبات كتير فى نفس ظروفى بدردش معاهم.

-استغليت الوقت الرهيب اللى عندى وأنا قاعدة بالأولاد بالليل فى القراءة والرغى مع صاحباتى فى التيلفون.

-استمتعت بعيلتى وأصحابى اللى زارونى وجابولى هدايا حلوة.

-أول ما بقيت كويسة نزلت اشتريت هدوم واكسسوارات جديدة لنفسى وروحت عند الكوافير ظبطت نفسى.

-اشتريت مجلات الأمهات وبقيت أستمتع بكونى أم.

-ابتديت أعمل رياضة خفيفة بعد ما عديت أربعين يوم عشان أرجع لجسمى قبل الحمل.

 لسة عندى حاجات كتير نفسى أحكيها.. أشوفكم المرة الجاية

سلام لكل مامى أو مشروع مامى.

 


 *هذه المقالات تعكس وجهة نظر الكاتبة وهدفها نقل الخبرات الشخصية مع الأمومة. ننصح كل أم أن تأخذ ما يناسبها فقط وتستشير طبيبها الخاص فى الأمور الطبية.

Facebook Comments

شيماء الجمال

شيماء الجمال كاتبة ومدونة في مجال الأمومة ، ومؤسسة Ana7amel.net . يمكن الاتصال بها على info@ana7amel.net .

زر الذهاب إلى الأعلى