أطباق رئيسيةوصفات لذيذة

المندى

 

المندى

المندى

كلة طعمها رااااااااائع على الفطار ف رمضان …. المندى

المندى معروف أوى ف الدول العربية وخاصة السعودية واليمن… وبدأ ينتشر فى باقى الدول وبقى معروف أوى فى مصر كمان.

المقادير بقى (لأربع اشخاص)
• فرخة متوسطة منزوعة الجلد والدهون ومقسمة على أربعة.
• تتبيلة الفراخ: طماطماية مبشورة- عصير ليمونة- معلقتين خل كبار- بصلة مبشورة ناعم- معلقة صغيرة حبهان مطحون- رشة قرفة- ورقتين لورا مجروشين- رشة جوزة الطيب- نص معلقة صغيرة لومى مطحون (ليمون أسود مجفف مطحون)- ملح وفلفل- زعفران وملون الطعام البرتقالى بتاع الكبسة ده
• أرز بسمتى
• توابل الرز البسمتى: 5 فصوص حبهان- 5 قرنفل- عودين قرفة- 3 ورقات لورا- 4 وحدات قرنفل- ملح وفلفل- فلفل حامى صحيح- نص مكعب ماجى لكل كوب أرز- زعفران وملون الطعام البرتقالى
• جزرة متوسطة مقطعة متوسط
• حزمة كزبرة خضرا

مقادير صلصة التقديم:
•2 طماطم- فصين توم- ملح- رشة كزبرة ناشفة- معلقتين كبار كزبرة خضرا- عصرة ليمون
الطريقة:
• نتبل الفراخ بالتوابل دى ونسيبها ف التلاجة طول الليل (أو لمدة 6 ساعات على الأقل)
• الرز ننقعه فى ماء مغلى لمدة 3 ساعات على الأقل
• نسخن الفرن على 200 درجة مئوية
• بعدين نجيب صينية فرن ونحط فيها الرز ومعاه التوابل وعليه كمية الميه بتاعته كأننا هنسويه على النار
• نغطى الصينية بفويل ونخرمه كذا خرم بالشوكة
• بعدين نحط الفراخ فوق الفويل المخرم ده ونحط معاها الجزرة المتقطعة والكزبرة الخضرا
• نلف كل الصينية على بعضها تانى بفويل ونحطها ف الفرن تستوى لمدة ساعة … الطريقة دى بتخلى الفراخ تنزل ميتها على الرز وتنديه… عشان كدة إسمه مندى.
طريقة الصلصة:
• نحط كل مكونات الصلصة مع بعض فى الخلاط ونضربهم كويس على البارد ونظبط الملح وتقدم باردة.

وحسب برنامج الرجيم هيكون كل واحد مسموح ليه بربع فرخة و6 معالق رز… ده لو حد عرف يمسك نفسه من الأكلة التحفة دى.

ورمضان كريم

Facebook Comments

إيمان حلمي

مع انها صيدلانية… الا ان اكتر حاجة بتحبها إيمان حلمى هى انها تطبخ اكلات كتيرة من الاكلات المفضلة عندنا بطريقة تكون ماشية مع الدايت وف نفس الوقت تحافظ على الطعم الحلو… ومن ساعتها قررت تشارك الفكرة دى مع كل الناس اللى نفسهم يعملوا دايت ومايزهقوش.. من خلال اكلات جديدة ولذيذة… ودايت!

زر الذهاب إلى الأعلى