الرضاعة الطبيعيةيوميات ماما

الـBreast pump و البقرة الحلوب

 

 

 البقرة الحلوب

الـBreast pump و البقرة الحلوب

  يوميات ماما#7

أحسن  حاجة فى  الـpump إنها بتساعدك إنك تعيشى حياة طبيعية زى ما قلت لك قبل كدة، لأنك بتقدرى تشيلى اللبن المشفوط فى ببرونات وتخزنيه فى الثلاجة وتستخدميه عند اللزوم، تقدرى تحتفظى باللبن فى الثلاجة على درجة حرارة 4 مئوية أو على أعلى رف فى التلاجة لمدة خمسة أيام. ولو حسيتى إنك مش هتستخدميه علطول، ممكن  تحفظيه فى الفريزر لمدة 6 شهور كاملة على درجة حرارة 18مئوية. عموماً أنا عمرى ما اضطريت إنى أشيل أى لبن مشفوط فى الفريزر لأن عندى توأم  : )  فيعنى  الدنيا كانت متلصمة بالعافية أساساً.

 فيه ثلات وسائل لشفط اللبن من الثدى: إستخدام اليد، أو استخدام الـ pump  اليدوى أو الكهربائى والثلاثة كويسين على حسب إنتى متعودة على إيه، وإيه اللى مناسب لظروفك. ميزة إجادة استخدام اليد فى تشفيط اللبن هى إنك مش هتحتاسى فى أى مكان تروحيه، ولو نسيتى الـpump هتعرفى تتعايشى عادى خالص برة البيت. عشان كدة أنصحك تتدربى على الطريقة دى وماتزهقيش فى الأول، لأن اللبن ممكن ينزل بعد دقيقة أو دقيقتين من المحاولة.

 فى أوروبا والدول المتقدمة، الأمهات بياخدوا علب حفظ للبن اللى بيشفطوه معاهم فى الشغل وبيحطوها فى تلاجة الشغل وياخدوها البيت، وده لأنهم ناس بيقدروا قيمة لبن الأم وماعندهمش أمراض إجتماعية. لو إنت ست قوية الشخصية ومش فارق معاكى تريقة زملائك الرجالة فى الشغل و”نمهم” عليكى، جربى تحطى علبه اللبن دى فى التلاجة وتحدى مجتمع الرجال الساخر اللى عندك. فى الشتاء الوضع بيبقى أظرف كتير لأنك ممكن تحطى علبه اللبن المشفوط فى شنطتك ساعة ولا ساعتين لحد ما تروحى البيت ولا من شاف ولا من درى.

 أكتر حاجة بقى ممكن تضيع مجهودك المضنى اللى بذلتيه  فى تشفيط اللبن وتجميده إنك تروحى مسخناه فى الميكرويف، لأن كل الأجسام المضادة والفيتامينات اللى فيه بتتكسر وبيبقى ملوش أى فايدة. ودى نصيحة سمعتها من دكتورة زوجة أخويا وتأكدت فعلاً من صحتها..عشان كدة بحط الببرونة دايماً فى حمام مية دافية قبل الرضاعة وأتأكد من إنها مش ساخنة قبل ما يشربوا منها.

 الرضاعة الطبيعية واستخدام الـpump موضوع كبير جداً الغرب بيفرد له كتب ومراجع ومواقع  كاملة. ولأنه موضوع مهم جداً  بالنسبالى.. اهتميت إنى أقرأ عنه قبل ولادتى واعتمدت على كتاب كويس باللغة الإنجليزية اسمه The essential guide to breast feeding لـ Marianne Neifert  وده بيتباع فى مصر فى المكتبات الكبيرة بسعر 90 جنيه بالإضافة  لمواقع الإنترنت الموثوق فيها، وصدقينى فى الموضوع ده بالذات النصيحة الواحدة ممكن تفرق معاكى وتريحك  كتير.

 مع تمنياتى بتجربة شفط سعيدة!

 *هذه المقالات تعكس وجهة نظر الكاتبة وهدفها نقل الخبرات الشخصية مع الأمومة. ننصح كل أم أن تأخذ ما يناسبها فقط وتستشير طبيبها الخاص فى الأمور الطبية.

Facebook Comments

شيماء الجمال

شيماء الجمال كاتبة ومدونة فى مجال الأم والطفل ومؤسسة موقع أنا حامل. للتواصل معها يمكنكم مراسلتها على info@ana7amel.net.

إغلاق
إغلاق