الرضاعة الطبيعيةيوميات ماما

الرضاعة كنز لا يفنى

 

 

الرضاعة كنز لا يفنى

الرضاعة كنز لا يفنى

يوميات ماما#6

 تفكيرى تطور كتير بعد إنجابى للتوأم مالك ونديم، مش عارفة هل ده بسبب إنى كبرت سناً؟، ولا بسبب كم  المقالات والكتب الكبير اللى قرأته وأنا حامل؟، ولا بسبب شغلى فى الحضانات مع الأطفال الصغيرين؟..مش عارفة إيه سبب التغيير ده بس متأكدة إنه حصل وبقوة.

 أكبر دليل على كده هو نظرتى اللى اتغيرت  للرضاعة الطبيعية. لما خلفت إبنى الأول فراس مكنتش بحب الرضاعة الطبيعية تماماً..كنت بكرهها إن جازت الكلمة..كنت بحس إنها شىء ممل وإنها بتتطلب إلتزام كبير عشان كده كنت “بكروِت” فيها وفطمت إبنى قبل ما يكمل خمس شهور.

 دلوقتى لما بفتكر الأيام دى بحس إنى إرتكبت جريمة ف حق إبنى الكبير ..ظلمته وظلمت نفسى لما حرمته من الرضاعة، بس عزائى الوحيد إنه كان عندى 20 سنة وماكنتش راكزة زى اليومين دول وكمان مكنتش أعرف أهمية الرضاعة الطبيعية..دلوقتى لو رجع بيا الزمن كنت هتمسك بالرضاعة الطبيعية بكل قوتى.

 الرضاعة الطبيعية ليها مميزات كتيرة بالنسبة للأم والطفل لا تعد ولا تحصى، لكن خلينى أقولك أهم الحاجات من وجهة نظرى: أولا كفاية إحساس إن إبنك فى حضنك وإنك السبب – بعد ربنا سبحانه وتعالى – فى إنه يشبع ويكبر ويتغذى. وجربى تبصى ف عينه كويس وإنتى بترضعيه وشوفى هو سعيد وراضى إزاى، ولما يكبر وياكل أكل ناشف أو يرضع من الببرونة قارنى بين إحساسه وهو بيرضع منك أو وهو بياكل من الببرونة هتحسى بفرق كبير قوى. ثانياً، تعرفى إن الرضاعة الطبيعية بتحمى ابنك من الإلتهابات المعوية والإكزيما والتهابات المسالك البولية والتهابات الرئة والأذن. ومش بس بتحميه وهو طفل، الدراسات أثبتت إنه الأطفال اللى رضعوا من أمهاتهم رضاعة طبيعية  أقل عرضة للإصابة بإرتفاع الضغط والنوع التانى من مرض السكر يعنى بإرضاعك لإبنك إنتى بتحميه من أمراض كتير مستقبلية.

 ثالثا بقى وده شىء مهم جدا كفاية إن الرضاعة بتحمى من الإصابة بسرطان الثدى وهشاشة العظام وسرطان المبيض وده شىء رائع فى حد ذاته.

 عشان كل الأسباب اللى فاتت دى قررت أتمسك بالرضاع من أول يوم ومن أول ساعة كمان، ورغم ألم الولادة إلا إنى حاولت أرضع الأطفال من أول ليلة وبذلت مجهود عشان الموضوع ده ينجح.

 ستات كتير لسة حوامل أو ما جربوش الرضاعة فاكريبن الرضاعة دى حاجة ميكانيكية..فاكريين إنهم هيدوسوا على الزرار اللبن هينزل والبيبى هيرضع بإنتظام والدنيا هتبقى فل وعال العال..الحمل والولادة حاجة طبيعية ربانية بتحصل لوحدها برضه، لكن على الرغم من كده بنقرأ وبنتابع وبنروح عند الدكتور وبنسأل وبنتعلم..نفس الفكرة  بالنسبة للرضاعة، حاجة طبيعية لكن محتاجة مجهود عشان تتم بالشكل المثالى وتستمر بنجاح..وفعلاً ممكن تكون متعبة شويتين تلاتة..لكن إحنا متفقين من الأول إن موضوع الأمومة ده متعب كله على بعضه..أمال هندخل الجنة إزاي؟ّ! 🙂

 شخصياً، شوفت فيديوهات على موقع يوتيوب عن الرضاعة الطبيعية، فيدوهات تعليمية بتتكلم عن الرضاعة وبتوريكى أوضاع مختلفة ممكن ترضعى بيها البيبى وبصراحة كانت مفيدة جدا خصوصاً إنها عرفتنى إنه ممكن الأم ترضع إبنها وهى ممدة على السرير وده أصبح الوضح الأمثل بالنسبة لى خصوصاً لو مرهقة أو ظهرى بيوجعنى..طبعا فى البداية كان فيه شوية وجع لكن إنتهى بعد حوالى إسبوعين من الإستمرار فى الرضاعة واستخدام المسكنات اللى كتبتلى عليها الدكتورة والكريمات المرطبة.

 بالنسبالى، لأنى خلفت توأم فالدكتورة كتبت للأولاد لبن صناعى من أول يوم بالتبادل مع الرضاعة الطبيعية، لكن بصراحة أنا كنت بحاول أقلل الببرونة بقدر الإمكان ف أول شهر لحد ما يتعودوا على الرضاعة ويحبوها، والحمد لله دلوقتى بيقبلوا على الرضاعة بشكل جيد جداً مع الببرونة وده كسر عندى القاعدة اللى بتقول إن الطفل اللى بيرضع من الببرونة بيبتوقف عن الرضاعة طبيعية. وفقا لتجربتى، الببرونة لم تؤثر على الرضاعة والأولاد عارفين الفرق بين ده وبين ده، وأحيانا بيرفضوا الببرونة عشان عايزين يرضعوا طبيعى خصوصاً وإن الرضاعة  الطبيعية بتديهم الحنان والأمان فبيعرفوا يناموا كويس لأنهم بيبقوا ف حضنى وهم بيرضعوا. لو عندك طفل واحد نصيحة منى تحاولى تستغنى عن الببرونة بقدر المستطاع خصوصا ف الشهر الأول اللى هتبقى أجازة فيه – لو بتشتغلى- لحد ما تضمنى إنه تعلق بالرضاعة تماما وبقت حاجة أساسية عنده.

 خدعوك فقالوا إنك مش هتعرفى ترجعى شغلك عشان الرضاعة الطبيعية..الحمد لله أنا رجعت الشغل بعد 3 أسابيع ومحافظة على الرضاعة لحد دلوقتى، أى نعم الموضوع  صعب قوى، بس الموضوع يستاهل التضحية. الفضل فى ذلك يرجع للصديقة الصدوقة للمرأة العاملة ومحبة الخروج “مضخة الثدى” أو الشفاط”  لكن  أرجوكى اسمحيلى أقول عليها pump لأن الإسم الأول بيحسسنى إنى ف حقل بترول، والتانى بيحسسنى إنى فى المطبخ.

 لو شغلك أو خروجاتك بتطول هتبقى الpump  فى شنطتك زى المناديل واللبان والشيكولاتة. بعد كام ساعة طبعاً من خروجك هتجرى على الحمام عشان تشوفى حل فى هدومك اللى هتبتدى تتبقع قدام الناس، ومش هينفعك ساعتها غير الpump  وفوط الثدى أو الbreast pads ودى فوط صغيرة مدورة تشبه مادتها مادة  الفوط الصحية بتتحط جوا ال bra عشان تمنع نقط اللبن الزائد من الوصول لملابسك وتنقذك من الكسفة قدام المجتمع العظيم اللى برة…السنتين اللى فاتوا ابتدوا يبيعوا فوط ثدى قطنية ممكن تتغسل وتستخدميها أوفر من اللى بتترمى لو كنتى من محبات التوفير. ثمن فوط الثدى اللى بتترمى ممكن يوصل لخمسين أو ستين جنيه للعلبة اللى بتكفى من إسبوع لعشرة أيام على حسب استخدامك، بينما سعر العلبة الصغيرة بالنسبة للى بتتغسل حوالى 40-50 جنيه للست قطع ودى بتعيش لحد ما تتقطع من كتر الغسيل…الخلاصة أمنى نفسك يا بنت الحلال.

 المرة الجاية هحكيلك عن الpump صديقتى الصدوقة وإزاى  بتستخدم وكل حاجة عن حفظ وتجميد اللبن المشفوط.

 *هذه المقالات تعكس وجهة نظر الكاتبة وهدفها نقل الخبرات الشخصية مع الأمومة. ننصح كل أم أن تأخذ ما يناسبها فقط وتستشير طبيبها الخاص فى الأمور الطبية.

Facebook Comments

شيماء الجمال

شيماء الجمال كاتبة ومدونة في مجال الأمومة ، ومؤسسة Ana7amel.net . يمكن الاتصال بها على info@ana7amel.net .

زر الذهاب إلى الأعلى