أطباق رئيسيةوصفات لذيذة

البيف ستروجانوف

 

البيف ستروجانوف

البيف ستروجانوف

مقادير الستروجانوف: (لأربع أشخاص)
• كيلو لحمة بتلو فيليه مقطعة شرايح (أنا بقول للجزار إنى هعملها ستروجانوف وبخليه يقطعها رفيعة أوى عشان ماتاخدش سوا)
• ملح وفلفل
• معلقة زيت زيتون
• بصلتين وسط متقطعين شرايح
• فصين توم مفرومين
• علبة مشروم معلب أو مشروم فريش
• معلقة صلصة
• كوبايتين شوربة لحمة منزوعة الدسم
• نصف كوباية لبن رايب خالى الدسم + معلقة دقيق
• معلقة كبيرة مسطردة

الطريقة:
• نتبل اللحم بالملح والفلفل
• فى طاسة أو حلة تيفال نشوح اللحمة على نار عالية جدا لحد ماتلون شوية بعدها نرفعها على جنب
• فى نفس الطاسة نحمر البصل بعدين التوم بعدين المشروم لحد مالمشروم يرجع يشرب ميته تانى
• نضيف عليهم معلقة الصلصة ونقلب بعدين ننزل بالشوربة ونرجع نضيف اللحمة عليهم تانى ونغطى
• أول ماتغلى نخلى النار متوسطة ونسيبها تستوى (حوالى 30-40 دقيقة)
• فى آخر خمس دقايق نضيف المسطردة واللبن الرايب والدقيق ونقلب بسرعة عشان الدقيق مايكلكعش
• نسيبها تاخد غلوة واحدة بس مش أكتر ونطفى عليها

دى الطريقة الأصلية (بس طبعا أنا استبدلت الكريمة الحامضة باللبن الرايب والدقيق عشان الدايت)… إنما فيه بلاد تانية بتضيفلها فلفل ألوان أو بتخلى الصوص أحمر أكتر شوية… حسب إللى انتو بتحبوه أكتر… المهم تستمتعوا

ومعاها الرز الأبيض أو المكرونة المسلوقة والخضار السوتيه والسلطة حقيقى أكلة لذيذة وتشبع ..

Facebook Comments

إيمان حلمي

مع انها صيدلانية… الا ان اكتر حاجة بتحبها إيمان حلمى هى انها تطبخ اكلات كتيرة من الاكلات المفضلة عندنا بطريقة تكون ماشية مع الدايت وف نفس الوقت تحافظ على الطعم الحلو… ومن ساعتها قررت تشارك الفكرة دى مع كل الناس اللى نفسهم يعملوا دايت ومايزهقوش.. من خلال اكلات جديدة ولذيذة… ودايت!

زر الذهاب إلى الأعلى