التربيةالسنوات الأولىبعد الخمس سنواتسنوات المراهقةصحة ونمو طفلك

الانتهاكات الجنسية ضد الأطفال: كلمتين للأهالى

 

الانتهاكات الجنسية ضد الأطفال: كلمتين للأهالى

الانتهاكات الجنسية ضد الأطفال: كلمتين للأهالى

كلمتين للأهالي فيما يخص الانتهاكات الجنسية ضد الأطفال (تويتات مجمعة)
بقلم: سارة السباعى، باحثة اجتماعية

عندي رجاء للأهالي في الموضوع ده، مهما كان إللي بيحكيه إبنكم أو بنتكم شكله خيالي، ومرتبط بشخص ثقة، صدقوهم عشان المعتدي بيعتمد على تكذيبكم لهم.

ومافيش أي مشكلة لما العيال تبقى مش عاوزة تتحضن أو تتباس فتسيبوهم على راحتهم حتى لو جدو وتيتة وخالتو وعمو هيزعلوا. لما بتجبر العيل انه يخضع لتصرف حميمي عشان حد ما يزعلش فانت بتنقله كل الرسايل الغلط الخاصة بخصوصية جسمه وده هيطلع تلقائيا لو حد تعدى عليه.

ولو حصل وعرفت ان إبنك أو بنتك جرالهم كده، ودوهم لحد متخصص، بلاش فزلكة. وكررولهم كتير جدا انهم مالهمش ذنب، عشان المعتدي بيزرع الذنب جواهم.

أغلب الانتهاكات الجنسية ضد الأطفال بتكون من المقربين محل ثقة الأسرة، لأن ببساطة الأهالي بتخاف تسيب عيالها مع حد غريب. دلوقت انت لو عندك إبن او بنت، هتسيبهم مع حد غريب؟ أكيد لا.هل المقربين ما ينفعش يكون فيهم حد نفسيته مريضة كده؟ لا. أكتر من حد أعرفه إللي قام بالاعتداء عليهم في طفولتهم كان الجد أو العم. شيء حزين جدا ومفجع لدرجة تخليه شبه خيالي، بس ده الواقع. ده غير طبعا ان في أوقات مش قليلة، المعتدي بيكون الأب نفسه، فلازم نلاقي آلية للاطفال دي يستغيثوا بيها بحد برا البيت.

وطبعا الشيوخ والقساوسة مش لازم يكونوا محل ثقتكم في عيالكم لأن الشهادات متكررة ان في منهم مارس الاعتداءات دي على أطفال وللأسف الأهالي ما بتصدقش عشان ده رجل دين وكده

وهي غير مقتصرة على الرجالة، في ستات بتقوم بالاعتداء الجنسي على الأطفال، بنات وولاد. ولا الضحايا بنات فقط، الولاد كمان بيتعرضوا لده. واحنا عشان في كوكب ذكوري، بيكون أصعب بكتير جدا للولد انه يقول انه تم الاعتداء عليه، واه عشان ذكوريتكم وصلاله في الصغر بطريقة ما.

مش بس الأب والأم، كلنا في أطفال غاليين في حياتنا، إبن أخوك أو أختك، أحفادك، ولاد الجيران وصحابك المقربين، تلامذتك لو مدرس، فكلنا علينا مسئولية. ماتساعدش بأي طريقة ان الطفل توصله رسالة غلط فيما يخص جسمه وانه ملكه وله خصوصيته، مش عاوز يبوسك؟ ما تتقمصش ولا تحسسه بالذنب. 100 خط تحت ذنب. مش باقول ما تبوسوش الأطفال ولا تلاعبوهم ولا تحضنوهم، الحميمية مهمة جدا للطفل، فقط لما يكون موافق عليها ومرحب بيها، مش عافية هي.

ده فيلم لطيف معمول انيميشن للاطفال عشان يساعدكم تفهموهم:
https://www.youtube.com/watch?v=NDOzeE9b1fY

ده رابط لكتاب متوفر في المكتبات تقدروا تستخدموه مع عيالكم:
https://www.facebook.com/photo.php?fbid=635049706581055&set=a.420427778043250.98515.419570968128931&type=1&theater

وده رابط لصفحة “حماية” إللي بتوفر للأطفال والأهالي توعية أكبر عن الموضوع ده وبتقدم دورات تدريبية ومواد توعوية، وبتوفر دعم لضحايا الانتهاكات وأسرهم
https://www.facebook.com/Safekidseg

نقطة أخيرة، حابب تعمل فيديو توعوي عن التحرش بالأطفال؟ ما ينفعش تستغل طفل فيه، عشان ده انتهاك هو كمان، حتى لو بحسن نية

مش قادرة أشوف زيكم ان مافيش فايدة من الكلام، موضوع الاعتداءات ع الأطفال بالذات فيه أمل لأن أغلب الناس بتحب عيالها. محتاجين يفهموا بجد بس.

ربنا يحفظ العيال كلها من شرورنا.

Facebook Comments

فريق عالم الأم و الطفل

يتطلع فريقنا دائمًا لإطلاع القراء على آخر الأخبار والأحداث والنصائح الملهمة والمفيدة التي شاركها الآخرون.

زر الذهاب إلى الأعلى