الأمومةبعد الخمس سنواتسنوات المراهقة

إزاى نحقق أحلامنا مع أولادنا

 

 

إزاى نحقق أحلامنا مع أولادنا

رحلتنا مع أولادنا مليانة بالأحلام، بنسعى ونجتهد علشان نوفر ليهم الأحسن وعادة بنستعجل النتيجة، علشان عايزين نتجنب ألم الانتظار والقلق ونفرح بالنتيجة حتى لو عارفين إنها مش بتعبر عن الحقيقة
درجات أولادنا النهائية مش بالضرورة يكون معناها إنهم اتعلموا صح

ميدالية البطولة مش بالضرورة يكون معناها إن الطفل نواة لبطل

انبساطه فى كامب حضره مش بالضرورة يكون معناه إنه اتعلم حاجة جديدة تفيده فى شخصيته زى ما عنوان الكامب بيقول

أمهات كتير بيعملوا زى ما الكل بيعمل و أدينا ماشيين. دراسة يعنى دروس و تقفيل امتحانات …. تدريب يعنى برايفت … صيف يعنى كامب …ويك اند يعنى ناكل بره

من كتر الضغوط بقت الأمهات مصدقة إن اللى بتعمله ده هيوصل أولادهم لبر الأمان وإنهم بكده يكونوا أدوا رسالتهم تمام التمام و بتتصدم الأم بعد سنيين لما تفوق وتبص حواليها وتلاقى إن طفلها واحد زى ملايين غيره، الكل اتدرب، الكل جاب درجات ودخل الجامعة، الكل لعب رياضة ودخل بطولات، فى الآخر الكل واقف طابووووووور مستنى دوره فى وظيفة مش عايزها أو ساب مجاله وتايه بيدور على ذاته

الأحلام الكبيرة عايزة صبر ، عايزة إصرار وبعد عن الناس السلبية والنمطية

الأم اللى بتربى شخص هيفرق مع المجتمع ما بتعملش زى ما الكل بيعمل ولا بتحبط و تقول ” يعنى أنا الوحيدة اللى هقدر !!!

عايزة نتيجة عظيمة مختلفة ، لازم تعرفى إن الرحلة هيقابلك فيها احباط من الآخرين، فترة بدون نتيجة، بس دايما خلى عندك يقين وإيمان إنك هتوصلى وفعلا فى يوم هتلاقى نفسك وصلتى وتلاقى أكتر ما كنتي بتتمني

طب إزاى؟؟

من خلال إنك تركزى على إنك تكونى سعيدة فى رحلتك كأم

تعملى اللى مقتنعة بيه لأولادك مش اللى الكل بيعمله

تهتمى بيه كإنسان قبل ما يكون ابنك أو طالب فى مدرسة

تهتمى بمشاعره قبل عقله، وعقله وقدراته قبل درجاته

تتعلمى علشان تعلميه، مش تسلميه للى يحفظه أسئلة الامتحان

تستمتعى معاه بوقته و حياته أكتر ما تملى حياته باللى يشغله عنك

 

Facebook Comments

ريهام سمير

ريهام سمير مستشارة مهنية في التعلم وتنمية المهارات الشخصية. ريهام أخصائية معتمدة في عسر القراءة من مركز بلاكفورد – لندن وعضو في جمعية عسر القراءة البريطانية. وهي مُعلمة معتمدة للانضباط الإيجابي في الفصل الدراسي من الرابطة الدولية للانضباط الإيجابي في الولايات المتحدة الأمريكية ، ومُنسِّقة معتمدة في اللغة الإنجليزية في TEFL وممارس معتمد في البرمجة اللغوية العصبية من المجلس الأمريكي للغة البرمجة اللغوية العصبية. تطبق ريهام تقنيات التعلم والتعليم الخصوصية الأكثر تقدمًا لخدمة أنواع عديدة من العملاء من مختلف الأعمار والأنظمة التعليمية.

زر الذهاب إلى الأعلى