إدارة وتنظيم البيت

أنواع مديرات البيت

 

أنواع مديرات البيت

بالتأكيد بتختلف كل مديرة بيت عن التانية فى أسلوب إدارتها لبيتها وأسرتها. الأكيد هو إننا كلنا بنسعى من أجل حياة أفضل وأوقات ممكن نتعب أو نزهق لكن بنرجع تانى نكمل فى مهمتنا العظيمة.

الأنواع المذكورة هنا هى مجرد ملاحظات عامة ممكن تساعدك فى فهم شخصيتك كمديرة للبيت وتصليح العيوب أو مواجهة المشاكل.  ممكن تلاقى نفسك فى نوع منهم أو فى نوعين مع بعض. المهم تعيدى اكتشاف ذاتك.

1- الطاحونة

الأم المطحونة شغل ومطحونة بيت وعيال وتمارين ودى مشغولة علطول وتعبانة علطول ودى غالبا بتكون  مركزة مع العيال بزيادة.

نتيجة ده بتكون: إهمال لنفسها وعدم وجود أفكار لتطوير البيت أو الحالة المعيشية وبالتالى اكتئاب

2- المحسوكة

ودى بتكون قلقانة من كل حاجة والبيت بيبرق علطول والعيال لازم يبرقوا علطول والأكل يطبخ بطريقة معينة ونشترى من أماكن معينة وهكذا

نتيجة ده بتكون: إهمال الجانب الفكرى أو العاطفى لنفسها وللأولاد – احساس بصعوبة جميع الأعمال – تأثير على مصروف البيت – قلق دائم وخوف من عدم تحقق المطلوب

3- الدماغ

ودى بيكون أكبر تركيزها على الأكل وان يكون فى غدا، لكن تتعايش مع الكراكيب عادى أو مفيش نظام ولا روتين ولا احترام مواعيد

نتيجة ده: تأثير سلبى على تربية الأولاد وضياع العديد من الفرص وعدم اتزان البيت – تأثير كمان على مصروف البيت

4- الشكاية

علطول بتقول انها عايزة تشتغل أو عايزة وقت لنفسها مع أن عندها وقت لكن مش بتعرف تستغله كويس – غالبا بطيئة مبتحسش بالاستمتاع ولا الراحة فى بيتها وغالبا أطفالها لسه صغيرين.

نتيجة ده: زهق من الحياة بأكملها بيأثر على رغبتها فى التعايش وعلى الأولاد طبعا.

5- الدلوعة

ودى اعتمادها الأكبر على ماما أو الشغالة أو النانى أو أى حد تانى عموما – بس مش ناسية نفسها ودى مشكلتها بتظهر للأسف متأخر بعد ضياع فترة طويلة من التخبط وعدم التركيز مع البيت والأسرة . غالبا بتكون أم جديدة.

نتيجة ده أنها بتصدم بالواقع فى أول مشكلة بترغمها على تحمل المسئولية. وبتظهر مشكلة عدم الخبرة.

6- الرايقة

علطول تهندم فى نفسها وفى البيت وممكن تقعد فى المطبخ ساعات وكل شىء واخد حقه وزيادة فى البيت وللأولاد. لكن ده تأثيره بيبان فى ضياع الوقت وعدم الالتزام بالمواعيد

7- المتوازنة

ودى بتحاول توازن كل الأمور بقدر الإمكان ومش مهم يكون كل شىء ممتاز فى كل الأوقات لكن كل الاحتياجات مجابة. النوع ده مشغول علطول لكن أحيانا بيكون الشغل نعمة.

بتحتاج دايما راحة أو اجازة تفصل من كله.

ياترى انتى مين فيهم؟

Facebook Comments

شيرين عزالدين

شيرين عزالدين خبيرة التنظيم الداخلى وإدارة البيت Home Management. تقدم شيرين عزالدين ورش عمل وكورسات بصفة منتظمة وهدفها أن ترتقى بالمستوى المعيشى وتزيد الترابط الأسرى بين الأسر المصرية.

إغلاق
إغلاق