الصحة العامةصحة ونمو طفلك

أشهر ١٠ س و ج عن المضادات الحيوية من واقع الأمهات

 

cough-medicine-jpg

أشهر ١٠ س و ج عن المضادات الحيوية من واقع الأمهات

١- إبني عيان أوي ومش قادر ياكل ولا يشرب، ليه ماديهوش مضاد حيوي؟
علشان ٩٠٪‏ من العدوى اللي بتصيب الأطفال فيروسية ومش بتحتاج لمضاد حيوي
فبالتالي انتى هتاخدي مضاعفات المضاد الحيوي من غير ماتستفيدي!

 

٢- إزاي أعرف إن العدوى فيروسية ولا بكتيريا؟
طبعا ده دور طبيب الأطفال، مَش انتى اللى تقيمى الحاله لكن في ٣ حاجات أساسيين:

١. لو الحرارة مستمرة بطريقة متزايدة أكتر من ٤٨ ساعه أو
٢. لو في إثبات من صورة الدم أو تحليل نسبة الميكروب بالدم أثبت عدوى بكتيريا Cbc , CRP titre
٣. لو الطفل شكله toxic وده حاجه بيعرفها الطبيب بالخبرة

 

٣- هيحصل إيه لو إديت المضاد كده أو كده
ممكن تصيب؟
هيحصل كتير
١- الطفل في السنين الأولى بيكَون مناعته. إحنا بالمضاد بنحرمه يكَون الذاكرة المناعية وبالتالي يعيا كتير.
كل الأطفال المعتادة ع المضادات بتعيا كتير
دايرة مغلقة!!
٢- مقاومة المضادات الحيوية يعني بعد كده لما الطفل يعيا بعدوي بكتيريا شديدة لا قدر الله المضاد مَش هيجيب نتيجة.
٣- بالإضافة طبعا للآثار الجانبية زي الحساسية والإسهال والطفح الجلدي

 

٤- بس الولد سخن ٤٠ والحرارة مَش عايزة تنزل. لازم مضاد؟
والله العظيم الحرارة مش علاجها المضاد علاجها خافض الحرارة – بارسيمول بالتناوب مع البروفين.
دورة حياة الفيروس ٤٨ ساعة علشان كده نصبر الفترة دى مع عمل كمادات واستخدام الخوافض عند اللزوم.
مفيش طفل هيحصله حاجة من إرتفاع الحرارة لو بنستخدم الخافض.

 

٥- الولد لوزه أنا شايفاها قد كده وعنده حيل كمان في رقبته…. لازم مضاد؟
٩٠٪‏ من إلتهابات الحلق واللوز فيروسي. لو في شك بنعمل تحليل الميكروب السبحي (بيطلع في نفس الْيَوْمَ) أو مسحة مزرعة من الحلق (بيطلع في ٣ أيّام) وبالتالي نعرف السبب والعلاج المناسب.

 

٦-هل المضاد الحيوي واسع المجال ده بتاع كله؟ بيعالج كل أنواع الميكروبات؟
معلومة غير صحيحة لإن كل نوع من المضادات بيعالج شريحة كبيرة من الميكروبات لكن مش كلها.
بيتم اختيار نوع المضاد حسب مكان ونوع العدوى، يعني المضادات المستخدمة في علاج إلتهابات الحلق غير الصدر غير التهابات البول، وكلها مكتوب عليها واسع المجال.

 

٧- طب إيه مدة إستخدام المضاد الحيوي؟
حسب نوع المضاد ونوع البكتيريا وحالة الطفل (والطبيب اللى هيحدد ده). بس في الغالب المده هي من ٧-١٠ أيّام، ماعدا الزيسروماكس تم تعديل الجرعة حسب الإرشادات العالمية الجديدة ل ٥ أيّام بدلا من ٣.

 

٨- طب المضاد بيتحط فين؟
بعد حله بالمايه يوضع في التلاجة في الأرفف وليس الباب وبيكون صالح ١٤ يوم بعد فتحه فقط

 

٩- طب إيه خطورة وجود مقاومة للمضادات الحيوية؟
معلومة عامة لتوضيح المشكلة: سنويا في أمريكا ٢ مليون شخص بيصابوا ببكتيريا مقاومة للمضادات الحيوية و٢٢ الف منهم بيموتوا. طب إحنا إيه حالنا اللي بنعتبر المضاد بونبوني

 

١٠- طب إيه النصائح إلعامة علشان نستخدم المضاد الحيوي بأمان؟
١- بلاش نطلب الدوا من الصيدلية. إزاي هتدي إبنك دوا خطير زي ده من غير ما يتم فحصه؟ الفعل ده يعاقب عليه القانون الطبيب لو أعطى مضاد بدون داعي مش لو الصيدلي.
٢- المضاد مش من الإسعافات الأوليه لخفض حرارة الطفل. إبدأي بالكمادات والخوافض
٣- إذا وصف الطبيب المضاد، إديه في مواعيده متفوتيش جرعة والتزمي بالمدة المحددة علشان مَش أول ما يتحسن توقفيه. كده إحنا بنعمل بإيدينا مقاومة عنيفة للمضادات بعد كده والطفل في الغالب هينتكس بعد كام يوم.
٤- متاخديش نفس الدوا اللي إبن صحبتك اتحسن عليه ولا اللي إبنك نفسه اتحسن عليه قبل كده. كل عدوي ليها ظروفها

 

Facebook Comments

مي سعد

د. مي سعد الدين إستشاري طب أطفال أبوالريش، وإستشاري دولي رضاعة طبيعية، ومؤسس تطبيق طفلي مع د. مي على الهواتف المحمولة
زر الذهاب إلى الأعلى