كلمتين للناس إللى مستنية توأم بمناسبة غلاء الأسعار

 


كلمتين للناس إللى مستنية توأم بمناسبة غلاء الأسعار



كلمتين للناس إللى مستنية توأم بمناسبة غلاء الأسعار


دول كلمتين منى موجهين للناس إللى مستنية توأم بمناسبة الأسعار والغلا وبجد كلام مهم ومفيد. أنا لما عرفت إني حامل في توأم من ٦ سنين إتخضيت وخوفت جدا، رغم إن الدنيا كانت غير الدنيا والأسعار كانت هايلة جدا بالنسبة لدلوقتي… و مع ذلك حاولت أكون عاقلة في الشراء علشان أهون على نفسي.


خليكي ذكية في الشراء ومش كل حاجة أي واحد معدي في الشارع يقولك هاتيها تجيبيها. التوأم عيبهم الوحيد إنك بتشتري كل حاجة مرة واحدة وفي حاجات بنضطر نجيب منها اتنين زي كرسي العربية وعربية البيبى لكن في حاجات كتير مالهاش أى لازمة ماتنقاديش وراها.


عندك مثلا خلاط البيبي، دا هبل في الجبل؛ أي خلاط عندك في البيت عادي ممكن تستخدميه ويفي بالغرض وزيادة أهم حاجة التنظيف والتعقيم.


عندك مثلا ال boiler اللي هي بتدفي اللبن برضو عبط، أي حاجه عندك فيها ميه مغلية هتدفي اللبن فإنسي.


في كمان ال baby monitor ودي بقي فيها موضات وموديلات وشغلانة ولا ليها أي تلاتين لازمة لأني إكتشفت إن في mobile applications بتعمل نفس الوظيفة بس محتاجة تحطي موبايل مستغنية عنه في الأوضة اللي فيها البيبي و application هتخلي التليفون يرن عليكي أول ما البيبي يعيط أو يصحي.


كمان ال playing mats دي كمان غالية على الفاضي وهتلاقي نفسك بتستعمليها شهرين مثلا تقريبا دي ممكن تستبدليها بأي mat ناعمة ونضيفة و soft toys و خلاص خلصنا. حاجات كتير اتفرضت علينا وبتزود من أعباءنا على الفاضي.


برضو ال kids tablets ملهاش عوزة لأنه ببساطة أي تابلت ممكن تعملي عليه kids mode فالطفل مايقدرش يخش علي أي حاجة غير اللعب والكارتون يبقي ملوش أي لازمة برضو.


أكبر خدعة سينيمائية بقى هي شنطة البيبي… أي شنطة حلوة تريحك ومتقسمة كويس تنفع، أنا أكتر واحدة غيرت شنط بيبي، الأول جبت الصغيرة علشان أوفر مكان منفعتش وبعدين جبت الكبيرة علشان بشيل كتير مريحتنيش وبعدين جبت شنط عادية قماش ملونة حلوة وبقيت أقسم بالطريقة اللي تريحني. خلاصة الكلام إنك تبقي ناصحة ومتخليش شغل ال marketing يخليكي تجيبي كل حاجة موجودة في الحياة. خليكي كمان عملية واعملي wish list بدل ما الناس ترمي فلوسها في الأرض و تجيب لك حاجات انتي مش محتاجاها، قولي عايزة إيه و خليكي عملية زي الناس بره، دي قمة التحضر.


لو عندك حاجة عايزة تسألي عليها إكتبي كومنت وأنا هارد عليكي ولو عندك صاحبة عايزة تفيديها إعملي شير