عايزة تكتشفى سر التوازن؟

 

عايزة تكتشفى سر التوازن؟


عايزة تكتشفى سر التوازن؟



 


عارفة الملاهي؟


ركبتي قبل كده اللعبة اللي بتلف وتطلع وتنزل وتهبد وترفع وتدوخ دي؟



!!!وتبقي مش عارفة اللعبة هتخلص امتي وتدخلي في حالة هستيريا من الضحك والصريخ والعياط والفرهدة والتعب وبعد ما تنزلي تقولي عايزة ألعبها تاني


في عالم التغذية بنشبه العلاقة المعقدة بين الجسم مع السكريات والمعجنات بلعبة الملاهى دى لأنها بتحط الجسم فى حالة مشابهة من اللخبطة


أكل بناكله يرفع نسبه السكر في الدم فالجسم يضخ أنسولين علشان يواكب اللى حصل ده فهرمونات التوتر تعلي وبعدين الأكل يتهضم


بس الأنسولين لسه عالي فتيجي هنا فقرة” دوخيني يا لمونه دوخيني”

هتحسي بجوع وبنهم للحلويات و المعجنات (مصحوبة بـ( فرهدة- قريفة- كسل- وخم


وبعدين نجووووووع تاني وتاكلي نفس الأكل أو أكل أشد تاااااااني


فتفرهدي وتتعصبي وتهمدي وتكسلي و تترمي علي الكنبة أو تبقي بره ومش قادرة تسوقي تروحي بيتك ومودك يقلب بعد ما كنتي في حالة نشوة من الأكل اللي بتاكليه.

وكل ده لأن السكر بيعمل التهابات جواكي و بيأثر علي توازن الهرمونات و مهما عملتي هتفضلى تعبانة وكتافك بتوجعك ومفاصلك تعبانة وأدوار عيا رايحة جاية وصداع كل شوية ومود خارج نطاق السيطرة.


دوامة كتير منا محبوسين جواها ومهما نحاول نظبط ونقلل مفيش فايدة ومحيط الوسط” الكرش” يزيد والميزان في الطالع.


عايزة تتخلصي من الدوامة دي؟

نفسك توصلي لحل في قلة الطاقة اللي الكافيين بقي مش نافع معاها؟


عايزة تاكلي وتبقي راضية عن نفسك وعن جسمك وتتخلصي من كراكيب الوزن الزايد؟


الحل هو التوازن.

اللي هيخلى وجبتك تشبعك وتغذيكى وهيساعدك تاكلي من غير حرمان ولا افراط

هشرحلكم قصه التوازن




و هديكي ٧ خطوات لتحقيق التوازن وجودة حياة أفضل بإذن الله


أولا إيه هو التوازن؟


التوازن معناه إن الأكل اللي بناكله ياخد دورته الطبيعية في الهضم من غير استعجال بحيث نقدر نستفيد منه الاستفادة المرجوة ويغذينا صح ونفضل شبعانين كام ساعة حلوين وكمان نحافظ علي نشاطنا وتركيزنا ومودنا الحلو.


دا هيجنبنا الدخول فى الدوامة اللى بندخلها لما أكلنا بيكون قائم عليالمعجنات والحلويات والمحمرات والوجبات السريعة اللى بترفع نسبه السكر في الدم ارتفاع مفاجئ وسريع يخلىالبنكرياس يضخ نسبة أنسولين عالية وطبعا الأكل ده مش بيشبع وسريع الهضم وكمان هيتحول السكر لدهون.


المشكلة الأكبر إن نسبه الأنسولين العالية دى بتدخلك في حالة جوع تاني ونهم شديد فناكل تاني والأكل يتهضم سريعا ويرفع نسبه السكر تاني ومع الحالة دي ييجي التعب وقلة التركيز والقريفة والكسل.


تكرار الدورة دي بيسبب النسيان والاكتئاب دا غير التهابات الجسم وعلي المدي الطويل بتجيب الزهايمر دا غير إن الأنسولين ده هو هرمون تخزين الدهون الزيادة عن احتياج الجسم.


أما السر ورا التوازن هو مكون وجبتك أو السناك بتاعك واللى علشان يكونوا متوازنين مفروض يحتووا على بروتين ودهون مفيدة وألياف.


يعني في الفطار اعملي البيض بسمنة بلدي أو زيت جوز هند أو زيتون وحطي معاه خضار.


لما تاكلي فاكهة رشيلها رشة قرفة مع معلقة شيا أو كليها مع شوية مكسرات قد الايد.


ايه بقى ال ٧ خطوات للتخلص من الدوامة دي؟


١- أول لما تصحى اشربي كوباية ميه سخنة وياريت تعصري عليها عصرة ليمون


٢- اهتمي بوجبة الفطار وكلي فيها بروتين


٣- اهتمي بشرب الميه خلال الْيَوْمَ


٤- لو نفسك فى حلويات كليها في سناك الضهر وحاولى تعلى قيمتها الغذائية


٥- قبل الغدا اشربي ميه سخنة تاني عليها قرفة وخل تفاح


٦-تجنبي المكرونة والرز الأبيض علي الغدا واستبدليهم بحبوب كاملة زي الفريك، الرز البني، أو حتي البسمتي


٧- تجنبي الأكل الدسم في المساء