المكرونة بالبشاميل

 

المكرونة بالبشاميل


المكرونة بالبشاميل

من اكتر الحاجات اللى اتطلبت منى …. المكرونة بالبشاميل انا شخصيا بموت فيها الصراحة


اولا خلينا نتفق ان احنا دلوقتى هنعملها لايت جدا… بس الكمية المسموح لينا منها اد ايييييييه؟؟؟؟ يسأل فى ذلك الدكتور… لأن احنا ف الغدا مسموح لينا 8 معالق مكرونة + 250 جرام بروتين+ خضار وسلطة…. فلو حسبناها كدة ممكن يبقى اخرنا هى قطعة المكرونة (15سم * 15 سم) + طبق سلطة كبييييييير


طيب… فيه طريقتين للبشاميل.. طريقة بالنشا وطريقة بالدقيق.. انا شخصيا بفضل اللى بالنشا عشان استسهال اولا.. ثانيا كدة كدة الدقيق والنشا فيهم نفس السعرات تقريبا.. بس ف النشا بستخدم كمية اقل مع اللبن عن الدقيق… يبقى استخدم النشا احسن


فيه حاجة كمان… بما اننا مفيش دهون خالص… حتى اللحمة كمان هنعصجها بمعلقة شاى واحدة زيت او سمنة (نفس السعرات بردو… معلقة شاى من زيت الزيتون او زيت الذرة فيها 40 كالورى) يبقى احنا ف الحالة دى لازم نعوض الطعم بحاجات كتير…. يعنى ف العصاج ييجى بقى دور الطماطم الفريش مع صلصة الطماطم مع البقدونس والبهارات…


البشاميل بقى:

طريقة الدقيق:

• معلقة كبيرة دقيق لكل كوباية حليب خالى الدسم… لو فيه دقيق اسمر يبقى خير وبركة لو مفيش يبقى دقيق عادى… وانا افضل الدقيق العادى لأن بردو مافيش فرق كبير بينهم ف السعرات..

• على نار هادية وف حلة تيفال من غير ولا نقطة زيت او سمنة… بتحمصى الدقيق على النار الهادية مع التقليب المستمر عشان مايتحرقش خلى بالك… لغاية مالونه يبدأ يصفر.. اطفى النار وبالمضرب السلك انزلى بالبن حبة حبة وقلبى بسرعة جدا عشان مايكلكعش منك…

• ظبطى التوابل.. ملح وفلفل وجوزة الطيب… عايزة تحطى شوربة اوك … فيه ناس كمان بتحط بيضة عشان البشاميل يبقى هش… كل واحد وطريقته…


طريقة النشا:

• بمنتهى البساطة حطى اللبن خالى الدسم على النار.. لحد مايبدأ يسخن بس قبل مايغلى… وتكونى مدوبة النشا فى شوية حليب وانزلى عليه بردو بمضرب السلك عشان مايكلكعش لحد مايمسك.. وانتى وحسب السمك اللى انتى عايزاه… وبردو التوابل والشوربة والكلام الكبير ده


• طبعا كمية النشا هنا هتبقى اقل من كمية الدقيق اللى ف الطريقة اللى فاتت… انا بقدرها بعينى بصراحة.. بس ممكن نقول ان 3 معالق كبار هيبقوا كفاية..


وبالهنا والشفا