التربيةالسنوات الأولىبعد الخمس سنوات

٩ طرق لتدريب الطفل على السلوك الجيد

 

???????????????????????????????????????????????????????????????

٩طرق لتدريب الطفل على السلوك الجيد

بقلم: سيريلاك مصر

دايما في تربية الأطفال خدي السلوك أو الطريقة الإيجابية و دايما راجعي اللغة اللي بتستعمليها مع طفلك. لما تستخدمي العاطفة و السلوك الإيجابي بتجهزي لنفسك إطار عمل لسلوك طفلك.

تغيير السلوك بياخد وقت و نص الشغل للتغيير ممكن يتعمل بالتأديب الإيجابي، و النص التاني بالتدريب. أفضل وقت للتدريب هو لما متكونوش في الموقف نفسه و لما تكون العلاقة بينك و بين طفلك كويسة و محدش فيكوا زعلان من التاني.

نقصد إيه بالتدريب؟

التدريب هو وقت مخصص لتعليم طفلك أساليب أحسن للتصرف و تعلميه إختيارات أفضل لسلوكه. و مهم قوي في التدريب ده، إنك تبعدي عن المحاضرات التأديبية يعني متبقيش من طرف واحد و حاولي تخلي التعامل و الحوار بينكوا إنتوا الإتنين، دايما خلي الحوار رايح جي. ممكن تكوني عايزة تدربي طفلك على كل السلوكيات الإيجابية و الكويسة فتحسي إن الموضوع كبير و صعب تنفيذه، بس فكري إنك تتناقشي معاه مرة أو إنكوا تعملوا نشاط واحد مع بعض في اليوم. و ممكن كمان تعملي كده يوم و يوم و على آخر الشهر هتلاقي إنك ركزتي على تعليم طفلك ١٥ سلوك إيجابي.

سلوك يقتدى بيه: إنتي المثل الأعلى لطفلك. لو عايزة تعلميه حاجة، إعمليها قدامه، يعني لو عايزة يرتب سريره، رتبي سريرك قدامه.

إقرأى قصص ليها علاقة بالسلوك: في كتب أطفال عن سلوكيات كتير، ممكن تلاقي كتب عن مواضيع زي: إزاي نعمل أصدقاء، المشاركة، إزاي نهدى و نتعامل مع الغضب و مواضيع تانية كتير. بعد ما تختاري السلوكيات اللي عايزة تدربي طفلك عليها، إختاري الكتب اللي بتتكلم عن السلوكيات دي و إشرحيها لطفلك بطريقة يفهمها و بأسلوب لطيف.

علقي على المواقف اليومية: لما طفلك يعمل سلوك كويس إمدحيه بوصف. يعني مثلا لو إستنى دوره في لعبة ممكن تقوليله “إنت إستنيت بصبر لدورك، إنت كنت صديق كويس”.

إحكيله قصص ليها علاقة بالسلوك: ممكن تألفي قصص. إعملي شخصية شبه طفلك جدا، و الشخصية دي بتمر يوميا بمواقف مشابهة للمواقف اللي طفلك بيتعرضلها. إنتي كده بتعلميه عن طريق الحكايات بطريقة غير مباشرة.

إسألي طفلك إنه يألف نهايات سعيدة للقصص: لو طفلك كبير كفاية، ممكن تبدأي قصة و تسأليه يألف نهاية سعيدة ليها.

تمثيل أدوار: بيساعد إنك تمثلي قصة مع طفلك. الفكرة كلها هي إنك تشجعيه إنه يختار السلوكيات و الكلمات الكويسة و الإيجابية. إتكلمي مع طفلك إزاي يتعامل في موقف بطريقة إيجابية عشان الوضع يمشي بسلاسة و إعرضيله كل الإختيارات اللي عنده.

عرض العرايس: كلنا بنحب العرايس، ممكن تستخدميهم عشان تحكي قصة عن الإختيارات و السلوكيات الكويسة. طفلك ممكن يكون جمهورك أو يشارك معاكي في القصة.

رسم صور عن مواقف بتخلص بنهاية سعيدة: لو طفلك هيقابل صحابه عشان يلعبوا مع بعض أقعدي معاه و إرسموا صور عن مشاركة الألعاب و إزاي ممكن يطلب مساعدتك في مشاركة الألعاب.

فكروا مع بعض: كذا عقل بيشتغلوا مع بعض أحسن من عقل واحد. ممكن تفكروا في ليستات عن طرق للوصول للسلوك الإيجابي اللي إنتي مركزة عليه سواء كان إنه يسلم على الناس أو يشارك ألعابه مع صحابه أو أي سلوك تاني. دايما شجعيه إنه يراجع الليستة عشان يجرب طرق جديدة

 

في طرق كتيرة جدا لتدريب طفلك على السلوك الإيجابي. دايما حاولي إنك تدربيه أكتر من إنك تأدبيه.

شاركينا أفكارك.

Facebook Comments

فريق عالم الأم و الطفل

يتطلع فريقنا دائمًا لإطلاع القراء على آخر الأخبار والأحداث والنصائح الملهمة والمفيدة التي شاركها الآخرون.

زر الذهاب إلى الأعلى