نمو وتطور طفلك

٨ نصائح إزاي تخلي المولود الجديد عبقرينو

 

smart-baby-2

 

٨ نصائح إزاي تخلي المولود الجديد عبقرينو

١. استجيبي بسرعة لما طفلك يعيط
غلط تماما نسيب البيبي يعيط بحجة إن كده بندلعه.
ده إعتقاد خاطئ تماما.
لما يعيط لاعبيه أحضنيه مشيه غنيله.
إحساسه بالأمان بينشط الخلايا العصبية عند الطفل.

 

٢. اعملي مساج يوميا لطفلك
المساج للطفل بيقلل التوتر والغازات والمغص والأهم بيزود الرابطة بين الأم والطفل ويديله شعور بالأمان.
في دراسات كتير بتأكد أهمية المساج لدرجة إن في دراسات للمواليد حديثي الولادة بتقول إن عمل مساج ٣٣ مرات يوميا بيقلل وقت إقامتهم في الحضانة.

 

٣. العبي ألعاب معاه
زي إنك تخبي وشك أو إستغماية.
اللعب ده بتخلي الطفل يتعلم العالقة السببية بين الفعل ورد الفعل ويبقي لماح ويربط بين الأحداث.

 

٤. اعملي مكان آمن ومريح للزحف
الطفل بيزحف علشان يستكشف البيئة المحيطة بيه ويعمل لها خرائط ذهنية.
فخلي مكان في البيت يكون آمن سطحه ناعم يعني ممكن تحطي سجادة أو البلوكز المعمولة من الفلين عشان رجلي ماتوجعهوش وميعورش من أي حاجة حادة في الأرض.
وشيلي طبعا مستلزمات البيت اللي مَش عايزاها تتدمر من المكان ده.
حطي بقى في المكان ده مكعبات وألعاب بتعمل صوت وأنوار علشان تلفت إنتباهه ويفكر إزاي يستغل ويربط كل ده في دماغه.

 

٥. غنيله أغاني مربوطه بالحركة
يعني مثلا أغنية “توينكل” مع لف الإيد.
“نقطي الزيت” وينقط بصباعه.
حتى لو الأغنية مفيهاش حركات ألفي.
ده بيساعد جدا على التناسق الحركي مع السمعي والبصري، يعني كل الخلايا العصبية المسئولة عن الحواس بتشتغل في نفس الوقت.
ده بينمي الذكاء جدا جدا.

 

٦. إبني الثقة بينك وبين طفلك
الطفل لما تلبي رغباته هيثق فيكي وبعدين يثق في نفسه إنه يقدر يكتشف العالم وهيشعر بقيمة الفعل ورد الفعل.
يعني مثلا البيبي يعيط علشان عايز حاجة …. إنتي جبتيها.
هيتعلم كده الفضول يعني لو عاز يشوف إيه جوه العلبة هيفتحها، لكن لو هو دائماً متطنش مش هيتربي عنده الفضول ده لأنه ما أدركش موضوع الفعل ورد الفعل
الفضول كان سر وراء اكتشافات علمية زي قانون الجاذبية والتفاحة
ماتستهونوش بالفضول.

 

٧. شجعيه وصقفيله
التشجيع بيزود ثقته بنفسه وثقته بمهاراته فيحب يطورها علشان ماما تتبسط وتصقفله.

 

٨. كلمي طفلك بمخارج ألفاظ واضحة ورني في الكلام
مراكز الكلام في المخ بتخزن كل كلمة الطفل بيسمعها ويشوف نطقها وياسلام لو كان كل ده ممزوج بلغة الحب والحنان في التعبير.
الطفل هيخزن كل ده وبيساعده مش بس على الكلام أسرع ولكن بينمي مراكز الإبداع والتخطيط عند الطفل.

 

في النهايهة ماتستهونيش بأي حاجة بتعمليها لطفلك
كل حركة
كل كلمة
بتترجم في خلايا مخه
حاجات بسيطة بس ليها تأثير كبير جدا والله
التعليم في الصغر كالنقش على الحجر

Facebook Comments

مي سعد

د. مي سعد الدين إستشاري طب أطفال أبوالريش، وإستشاري دولي رضاعة طبيعية، ومؤسس تطبيق طفلي مع د. مي على الهواتف المحمولة
زر الذهاب إلى الأعلى