١٥ نصيحة بخصوص الطعام لأم الطفل فى عمر السنة
١. مهم أوى تبنى عادة سليمة لوقت الأكل
بلاش أكل قدام التليفزيون ولا أى أجهزة
خلى للأكل إحترامه ووقته المحدد.
٢. عرفى إبنك على مذاقات الأكل المختلفة
بلاش يبقى بين المالح والحلو، أدى فرصة لحاسات التّذوق إنها تنمو صح وتتعود على كل المذاقات المختلفة
٣. قدمى لإبنك الأكلات المختلفة وعوديه دايما يتذوق بتشجيعك ليه
وبلاش ندخل الزعل فى الأكل.
يعنى بلاش “هزعل منك لو ما خلصتش طبقك” ولا “كل علشان خاطرى “!!
٤. أرجوكى أرجوكى
بلاش “كل علشان أجيبلك حاجة حلوة “!
ليه نعوده إنه بياكل الأكل المفيد علشان ياخد حاجة ضارة كتشجيع؟!
٥. دايما خلى فى متناول إيد إبنك سناكس صحية
زى طبق فيه خيار مقشر وخَس وجزر مبشور مثلا
علشان يتعود إنه لما يجوع بين الوجبات يأكل خضار مش بسكوت
٦. اعتمدى على وجبات صغيرة متنوعة خلال اليوم
الطفل فى السن ده معدته صغيرة ومش هيقدر يأكل طبق مليان
٧. بدل الوجبات سريعة التحضير المعلبة (اللى بتقدم للأطفال من سن ٦ أشهر)
اعتمدى على الأكل الطبيعي
اطبخي رز بني وأكليه لطفلك
ممكن باللبن على الفطار (مع ضربه فى الكبة شوية وطبعا نقعه قبل الطبخ)
بلاش الرز الأبيض والمكرونة لو بتدورى على غذاء إبنك السليم.
٨. بلاش عيش حاف أرجوكي!
وياريت بلاش عيش من بتاع المصانع خالص
٩. إقرى مكونات البسكوت وأى شىء مغلق
والأحسن بلاش منه خالص
١٠. بلاش جبنة مثلثات!!
ليه نأكله شىء مصنع لما ممكن يأكل بيض وفول وعدس وحُمُّص؟!
١١. عوديه يشرب ميه وأرجوكي بلاش العصير المعلب
١٢. تأكدى إن العادات اللى بتبنيها دلوقتى هيكون ليها أثر على صحته طول حياته
فاهتمي ببناء عادات وتغذية سليمة من أول يوم
١٣. نوعى فى الأكلات واستخدمى ألوان الخضار المختلفة فى تجهيز الشوربة والمأكولات المختلفة
١٤. اعملى كيك فى البيت بلاش نعتمد على البسكوتات والكيك المصنع علشان صحة ولادنا
١٥. أهم حاجة: كونى متأكدة إنك المصدر الأول لتعليم أطفالك
كونى قدوة وشجعيهم على العادات الصحية السليمة بتطبيقها على نفسك أولا
يعنى هو هيقلدك.. بلاش المشروبات الغازية اللى مليانة سكر وكوارث كتير
**زى ما بنبذل وقت وجهد ومال فى تخطيط مستقبل أولادنا.. هندخلهم مدرسة إيه وإيه أفضل شهادة علشان مستقبلهم..
أهم من ده كتير “صحتهم” واللى الغذاء السليم هيأمنها وباْذن الله يتمتعوا بصحه وسعادة.
هبة أنور ، أم لثلاثة أطفال ، هي مدربة صحية شاملة درست التغذية والتدريب في معهد التغذية التكاملية. وهي مؤسسة Smart Food بقلم هبة أنور . تهدف إلى رفع مستوى الوعي حول تأثير الغذاء على الصحة والرفاهية العامة لجميع البشر من خلال خلق ثقافة إيجاد البدائل. وتتمثل رغبتها في تمكين كل أم بالأدوات والمعرفة اللازمة لتقديم خيارات طعام أفضل لأطفالها. تقدم هبة دورات توعية وبرامج تدريب تحولية للنساء لمساعدتهن على الوصول إلى أفضل ما لديهن ، وفهم أجسادهن وتحديد الأطعمة التي تناسبهن بشكل أفضل.
