الأطعمة الأولىتغذية طفلكنمو وتطور طفلك

وجبة خفيفة وصحية لطفل سعيد

 

2384113340_bdb338afbd_o

 

وجبة خفيفة وصحية لطفل سعيد

بقلم: سيريلاك مصر

الأطفال معدتهم الصغيرة بتخليهم محتاجين ياكلوا وجبات أصغر بشكل متكرر على مدار اليوم أكثر مننا، والوجبات دى بتتضمن الوجبات الأساسية فى اليوم بجانب الوجبات الخفيفة فى النص.

علشان تختارى الوجبة الخفيفة المثالية لطفلك، احنا بننصح الأهل إنهم يتجهوا للأكل الطبيعى الصحى زى الخضروات والفاكهة والزبادى وغيره. ده هيساعد طفلك إنه ينمى عادات أكل صحية من سن صغير. وكمان تقطيعك للفاكهة أو الخضار  لقطع صغيرة فى حجم الصوابع ده كمان هاينمى عند طفلك حس الإعتماد على نفسه علشان هيقدر ياكلها لواحده منغير مساعدة.

فى النهاية كلنا عارفين إننا القدوة لأطفالنا، فحاولى تخلى وقت الوجبة الخفيفة هو وقت ثمين تقدوه مع بعض.

 

علامات الجوع والشبع فى الأطفال:

بالنسبة للأطفال اللى عدو سن الست شهور، علاقتهم مع الأكل أساسية لنمو وتأسيس مظبوط  والمرحلة دى مهمة لأنها اللى هتحدد علاقتهم بالأكل لبقية حياتهم. بس المرحلة دى صعبة علشان لسة مش بيتكلموا ولا بيعرفوا يعبروا عن جوعهم أو شبعهم وللأسف من كتر مابنكون عاوزينهم يكبروا ويتغذوا مش بنتعامل صح فى نظام أكلهم وكمان بسبب التقاليد وفكرة إن كل ما ياكل حتى لو بالعافية كل ما كان أحسن له. بس المشكلة دى حلها بسيط، هنقولك الطريقة الصح علشان طفلك يتأسس بـعلاقة صحية مع الأكل:

    • قدمى لطفلك كمية صغيرة من الأكل فى كل وجبة وزوديها شوية بـشوية لما يخلصها.
    • ما تصمميش إنه يخلص طبقه ولا ياكل بالعافية علشان ده هيعلمه إنه يتجاهل مؤشرات جسمه الطبيعية. الأفضل إنه يبطل أكل لما جسمه يكتفى ومعناها إن وصل لجسمه كمية الأكل اللى محتاجها.
    • تجنبى استخدام الأكل أو الحلويات كمكافأة علشان ده هيعوده ياكل للمتعة مش للجوع.
    • ساعات طفلك ممكن يكون عطشان مش جعان علشان كده تجنبى برده إنك تأكليه بالعافية، واعرضى عليه بعض الماء أو اللبن.
    • لو طفلك جعان هتلاحظى إنه بيتحمس فى وجود الأكل أو بيشاور على الأكل أو بيحاول يمسكه.
    • لو طفلك شبعان واكتفى من الأكل هتلاقيه بياكل ببطء أكتر وبدأ يزق الأكل بعيد أو يقفل بقه ويبطل أكل.

 

شجعى طفلك على الأكل:

الطفل ممكن يتشجع أكتر إنه ياكل لو هو ساعد فى تحضير الوجبة. لو تقدرى خدى إبنك معاكى وإنتى بتشترى حاجة البيت وإشركيه فى تنقية الخضار والفاكهة.

لما ييجى وقت الأكل ممكن تخليه يحضر السفرة أو يساعدك فى إنه يحضر الخضروات الورقية زى الخس ويجهزهولك عشان تغسليه وتقطعيه للسلطة أو السندويتشات.

لو هو مش عايز يساعد فى تحضير الأكل ممكن تقطعيله الخضار والفاكهة بطريقة تخليكى تعملى بيها أشكال مختلفة زى وجوه أو سمك أو ورد عشان شكل الطبق يبقى مشجع بالنسبه ليه.

فاكرة زمان فى المدرسة لما كانوا بيعلمونا نزرع بذور؟ ممكن تعملى كده معاه، خليه يزرع خضار وفاكهة فى البلكونة أو عند الشباك.

 

اللى هتعودى طفلك عليه من صغره هيطبقه بقيه حياته فـا عوديه على نظام غذائى صحى وعادات مظبوطة علشان يتأسس صح.

 

 

 

 

Facebook Comments

فريق عالم الأم و الطفل

يتطلع فريقنا دائمًا لإطلاع القراء على آخر الأخبار والأحداث والنصائح الملهمة والمفيدة التي شاركها الآخرون.

زر الذهاب إلى الأعلى