هبعت أكل إيه مع الولاد في اللانش بوكس؟
هبعت أكل إيه مع الولاد في اللانش بوكس؟
هل موسم المدارس علينا وبدأ حديث الساعة في كل البيوت وبين كل الأمهات: هنبعت أكل إيه مع الولاد في اللانش بوكس؟
طيب أنا بحب دايما افكر بطريقة علمية وعملية فخلينا نسأل نفسنا: هو إيه الأساس اللى محتاجة أركز عليه؟ وهيفرق في إيه؟
الأساس اللى محتاجة أركز عليه هو التغذية لأن ولادنا خلال الأيام المدرسية بيقضوا نص يومهم في المدرسة وبالتالى محتاجين طاقة تعينهم علي التحصيل والاستذكار والاستمتاع.
إيه من الأكل هيديني ده؟ هنا هنحتاج نعرف ونفهم الأركان الأساسية للوجبة الغذائية المتكاملة.
الوجبة المتكاملة محتاجة يكون فيها ٣ أركان:
–بروتين: وده ممكن يكون حيواني أو نباتي أو من الحبوب والمكسرات وزبدتها.
–الدهون: والدهون اللى مقصودة هي الأوميجا ٣ اللى بتعلي كفاءة الذهن وتنشطه ودي موجودة في زيت الزيتون وزيت الأفوكادو والمكسرات والأسماك علي سبيل المثال لا الحصر.
–الألياف أو الكارب: مفهومنا القديم إن الكارب ده العيش والرز والمكرونة مفهوم غير دقيق لأن الكارب هي الألياف اللى موجودة مش بس في الرز والمكرونه ( مصدر ضعيف ) اللى موجودة في الخضروات والفواكه والحبوب الكاملة والبقول.
دلوقتي اتضحت الرؤية.. أنا مش لازم أركز أنا باعتة مع ولادي كام سندوتش وكام بسكوتة علشان يشبعوا لكن أنا محتاجة أركز أنا باعتة إيه يغذي!
كده أنا عرفت الأساس اللى هو إنى هحتاج أنوع ما بين أصناف البروتين المختلفة وطبعا أتجنب المصنع منها.
يعنى أبعت شرائح لحمة باردة/ ديك رومي/ فراخ مسلوقة/ فراخ فاهيتا/ حمص بالزبادي/…. وهكذا.
هضيف الدهون إزاي؟
لو الأكل اللى هبعته مطهي هستخدم الزيوت المفيدة وأتجنب الدهون الضارة في الطهي اللى هى الزيوت النباتية المهدرجة زي زيت الذرة وزيت الكانولا وزيت العباد وزيت النخيل أو أرش رشة حبوب الشيا علي الأكل أو استخدم بذرة الكتان / أو المكسرات وزبدة المكسرات (مع الفواكه هتبقي وجبة كاملة).
وبالنسبه للعيش هننوع في الأصناف وأركز علي العيش اللى بالحبوب الكاملة وأحاول أستخدم الدقيق البديل في عمل البان كيك والكيك والبسكويت البيتي الأمن وأستخدم المحليات الطبيعية زي العسل / التمر/ دبس التمر/ الموز/ التفاح في تحلية الكيك والبسكويت وماننساش إن التنوع حلو ومطلوب وهيمد أولادنا بقيمة غذائية متوازنة.
اقصد بالتنوع التعدد في ألوان وأصناف الخضروات والفواكه اللى هتمد جسمهم بالفيتامينات والمعادن المختلفة والغنية بمضادات الأكسده اللى هتحافظ علي أجسامهم ومناعتهم قوية وسليمة باذن الله.
تاني بقول الاعتماد علي العيش الكتير والسكر المعلب في صورة عصير أو لبن مش أحسن حاجة تديها لولادك ومش هو اللى هيشبع بجد ولا المعجنات الكتير والحلويات لأن شبعها فاضي وقصير المدي مش زي البروتين والدهون المفيدة اللى هتشبع الجسم وتغذي العقل وتدي طاقة صح.
هبة أنور ، أم لثلاثة أطفال ، هي مدربة صحية شاملة درست التغذية والتدريب في معهد التغذية التكاملية. وهي مؤسسة Smart Food بقلم هبة أنور . تهدف إلى رفع مستوى الوعي حول تأثير الغذاء على الصحة والرفاهية العامة لجميع البشر من خلال خلق ثقافة إيجاد البدائل. وتتمثل رغبتها في تمكين كل أم بالأدوات والمعرفة اللازمة لتقديم خيارات طعام أفضل لأطفالها. تقدم هبة دورات توعية وبرامج تدريب تحولية للنساء لمساعدتهن على الوصول إلى أفضل ما لديهن ، وفهم أجسادهن وتحديد الأطعمة التي تناسبهن بشكل أفضل.
