نصائح زوجية للرجال فقط!
الجواز بداية الحب مش نهايته.
الإهمال العاطفي أخطر بكتير من الخيانة الزوجية.
الحب هو إنك تستمتع باللحظات مع الطرف الآخر مش على حساب الطرف الآخر.
إبني بينك وبين شريك حياتك لحظات حلوة على طول، وخليكم جمب بعض في اللحظات الصعبة.
كل يوم إنوي إنك تقعد تسمع مشاكل مراتك طول اليوم وإسالها عاملة إيه؟ محتاجة حاجة؟ صدقني ده هيفرق معاها جدا وتاثيره هيكون أقوي من أحسن هدية ممكن تجيبهالها.
ماتستغلش إنك مصدر الفلوس لزوجتك وتضغط عليها علشان تنفذ طلباتك، لإن ده مصدر إهانه ليها.
ما تتجوزش علشان تنسي اللي بتحبها
لأنك لو عملت كده لا هاتحب اللي اتجوزتها ولا هاتنسي اللي بتحبها….
لو مراتك في زنقة وانت ماساعدتهاش وسبتها لوحدها، بتزعل ليه بقي لما تتعود تعمل كل حاجة لوحدها وماتطلبش منك حاجة تاني؟
مراتك نكدية علشان انت بتنكد عليها.
مراتك زنانة علشان انت مش بتنفذ طلباتها.
مراتك مش مهتمة بنفسها علشان لما كانت بتلبس تحط مكياج كنت بتتريق عليها.
مراتك تخنت لأنها كانت بتطلع همها في الأكل.
مراتك بتزعق وعصبية مع الأولاد لأنك ضاغط على أعصابها فبيطلع على أولادك…
كل الصفات الوحشة اللي ظهرت على مراتك بعد الجواز انت السبب فيها.
ولو
مراتك فرفوشة وبتضحك وهادية وتربوية مع الأولاد ومهتمة بشكلها ولبسها ومكياجها يبقي انت برضه السبب لأنك مهييء الجو المناسب لكل ده.
شكل وتصرفات مراتك هو نتيجه اللي انت عملته طول سنين الجواز فيبقى ماتزعلش من نتيجة تصرفاتك.
وانت بتفطر مع مراتك وعيالك ما تخليش همك الأكل ولا الفرجة على التمثيلية..
خلي همك تقضي وقت معاهم ما يتنسيش علشان يأثر على علاقتهم بيك بالإيجاب
فكر في اللي قدامك علشان يفكر فيك
اتفقوا أول الجواز إن أسراركم ماتطلعش بره مهما حصل، وإن حتي لو اتخانقتوا يفضل بيتكم مقفول عليكم.
جددوا حبكم كل يوم بالكلام الحلو، ماتسيبوش الروتين يقتل العلاقة بينكم.
مقارنة شريك حياتك بأي شخص تاني هتخليك ماتشوفش الحلو اللي فيه وهتخلي عيونك دايما على الوحش.
محمد وديد هو مستشار زواج وعائلة حاصل على ماجستير في استشارات الصحة العقلية من كلية رود آيلاند بالولايات المتحدة الأمريكية وماجستير في الفلسفة من جامعة القاهرة ، مصر. يقدم مجموعة متنوعة من الخدمات الاستشارية.
