مكرونة بالأعشاب والبروكلى
المقادير: (لشخصين)
•8 معالق مكرونة مسلوقة (أو كمية المكرونة إللى مسموحة ليكوا بس نشيل منها معلقة)
• فص توم مهروس ناعم
• معلقتين بقدونس مفروم
• بروكلى متقطع وردات صغيرة
• أوريجانو أو زعتر أخضر
• معلقة ممسوحة جبنة كيرى (ماتستغربوش)
الطريقة:
• واحنا بنسلق المكرونة.. فى آخر 3 دقايق نحط البروكولى كمان فى نفس الحلة يتسلق نص سلقة
• باسبراى الزيت نرش رشة صغيرة… ولو مافيش نحط يادوب نقطتين زيت مش محتاجين أكتر من كدة… ونحمر التومة لحد ماتبيض
• بعدها ننزل عليها بالبقدونس…. والمية إللى فى البقدونس هتطفى التوم… لو ناشف نحط عليهم معلقتين مية عشان التوم مايتحرقش..
• وننزل عليهم بالمكرونة ومعلقة الجبنة والملح والفلفل والأوريجانو ونقلب كويس
• فى الآخر نضيف البروكولى ونقلب… حطيناه فى الآخر عشان مايتهريش
ممكن بقى ننوع زى ماحنا عايزين… اللى مش بيحب البروكلى ممكن يستخدم أى خضار تانى… كوسة.. فلفل ألوان.. مشروم.. سبانخ… ممكن مايستخدمش خضار خالص ويكتفى بالأعشاب بس.. بقدونس.. ريحان… شبت حتى!!!
كله يبدع براحته حسب مايحب.. وكله ياكل بألف هنا
مع انها صيدلانية… الا ان اكتر حاجة بتحبها إيمان حلمى هى انها تطبخ اكلات كتيرة من الاكلات المفضلة عندنا بطريقة تكون ماشية مع الدايت وف نفس الوقت تحافظ على الطعم الحلو… ومن ساعتها قررت تشارك الفكرة دى مع كل الناس اللى نفسهم يعملوا دايت ومايزهقوش.. من خلال اكلات جديدة ولذيذة… ودايت!
