مكافأة الأطفال بالبنبونى
مكافأة الأطفال بالبنبونى هى خطأ شائع بنعمله مع أولادنا والأجداد بيعملوه مع أحفادهم اللى هو إن تعبيرنا عن الحب والاهتمام أوالمكافأة أوالتحفيز بيبقي من خلال تقديم البنبونى والحلويات.
وللأسف دا مش بس بيحصل علي المستوي الأسري لكن كمان بيحصل في المدرسة إن المدرسين بيعملوا البنبونى حافز للأولاد علشان يلتزموا أو مكافأة لشطارتهم.
الموضوع ده بيسيب أثر جواهم هيمتد معاهم لحد ما يكبروا ولأن المخ بيلجأ دايما للحيل اللي يعرفها لجلب الشعور بالسعادة فكل مرة هيكونوا محتاجين يحسوا بالحب أو الاهتمام وكل مرة هيحبوا يطبطبوا علي نفسهم هيلجأوا للأكل.
الفكرة دى هتتحول جواهم لمفهوم بنسميه ال Emotional eating
أو النهم العاطفي
في الحالة دي بنلجأ للأكل علشان نطبطب علي نفسنا أو نكافئ نفسنا سواء علي مجهود بنعمله أو علي ظروف بنتحملها أو للتشويش علي حالة توتر أو لمجرد الرجوع لحالة الطفولة البريئة حيث اللامسئولية والدلع كله.
ونفضل نلف نلف في الدايرة المفرغة دى وإحنا مش واعيين إحنا بنعمل إيه ولا عارفين نخرج من الدوامة دي إزاي وكل ده بسبب إننا وإحنا صغيرين كانت الحلويات مصدر حب أو اهتمام أو تقدير من اللي حوالينا.
علشان نقدر نغير ونتغير محتاجين نمسك الخيط من أوله ونبني ثقافة جديدة علشان صحة أفضل لينا ولأولادنا وطاقة أحسن وتركيز .وهدوء نفسي
محتاجين نستوعب إن العادات الغذائية في الصغر هي الأساس وإن بناء عادات غذائية سليمة منذ الصغر لأولادنا هيوفرعليهم معاناه .كبيرة بعدين هى معاناة تحديات التغييراللي إحنا عايشينها وبنواجهها كل يوم
طيب الحل فين؟
الحل في إننا نتعلم أساليب جديدة للتعبير عن الحب والاهتمام والتشجيع والتحفيز غير تقديم الحلويات وهى إننا نفهم مفاتيح أولادنا .ونستخدمها للوصول للتعاون المرجو ولتوصيل الحب والاهتمام
وإن قبل كل ده نستوعب إن السكر فيه سم قاتل ونتعلم نقرأ مكونات الأكل بصفة عامة والحلويات بصفة خاصة قبل ما ناكلها ونأكلها .لأولادنا
.وخلينا فاكرين دايما إن اللي يحب حد بيخاف عليه و يحميه مش بيضره
خلينا نتعاون علشان صحتنا وصح أولادنا علشان نربي جيل قادر يحس بالحب والتقدير بجد مش بالحلويات والبنبونى
خلينا نتعاون علشان نوصل للتوازن ونحقق الصحة والسعادة.
لو بتدخلي في حالات أكل عاطفي
لو مش عارفة تتخلصي من حبك للحلويات والمعجنات
لو بتدخلي في حالات جلد ذات بعد الأكل
لو تعرفي حد بيحصل معاه كده
و نفسك تحمي ولادك من الدوامات دي
ساعدينا ننشر الفكر ده ونحوله لثقافة ونتخلص من نوبات جلد الذات ونتخلص من كراكيب الوزن الزايد والعادات الغذائية الخاطئة ونبني .للمستقبل جيل جديد عنده وعي وقدرة علي قيادة حياته بصحة وسعادة
هبة أنور ، أم لثلاثة أطفال ، هي مدربة صحية شاملة درست التغذية والتدريب في معهد التغذية التكاملية. وهي مؤسسة Smart Food بقلم هبة أنور . تهدف إلى رفع مستوى الوعي حول تأثير الغذاء على الصحة والرفاهية العامة لجميع البشر من خلال خلق ثقافة إيجاد البدائل. وتتمثل رغبتها في تمكين كل أم بالأدوات والمعرفة اللازمة لتقديم خيارات طعام أفضل لأطفالها. تقدم هبة دورات توعية وبرامج تدريب تحولية للنساء لمساعدتهن على الوصول إلى أفضل ما لديهن ، وفهم أجسادهن وتحديد الأطعمة التي تناسبهن بشكل أفضل.
