كيكة الزبادى

أولا: لعب أى نوع من أنواع الرياضة لأطفالنا بيفتح شهيتهم جدا بعد ممارسة التمرين أو اللعب والجرى حتى فى الحدائق..

طيب لو مفيش فرصة أو إمكانية لكدة .. نصيحتي قبل تقديم أى وجبة خاصة الغدا والعشا الامتناع عن أى نوع من أنواع الرمرمة سواء شيكولاتة أو بونبون؛ أكيد الحاجات دى مش مفيدة فى العادى ده غير انها بتسد نفس الأطفال عن الأكل.

النهاردة جبتلكم وصفة مميزة للكيك وهى كيكة الزبادى

طبعا واضح من إسمها إن مكونها الأساسى هو الزبادى .. تعتبر الوصفة دى من الوصفات السهل على الأم تحضيرها .. وطبعا لو هنقدم للولاد حاجة حلوة الأفضل إننا نعملها فى البيت ..

4 بيضات

كوب زبادى 200 جرام

كوب ونصف سكر بودرة

2 كوب دقيق

نصف باكيت بيكينج باودر

فانيليا

رشة ملح

شربات خفيف (كوب سكر + كوب ماء )

مكسرات أو جوز الهند

طبعا إحنا لو لاحظنا فى الوصفة دى مفيش زبدة ولا زيت وهنا هنكتفى بدسم الزبادى.

نضرب البيض مع الفانيليا ويفضل السائلة مش الفانيليا البودرة لطعمها اللذيذ واللى بيقضى على زفارة البيض نهائيا.

ثم نضيف السكر ونضرب بالمضرب الكهربائي على أعلى سرعة ثم الزبادى وباقى المكونات واحدة واحدة علشان منضيعش الهوا اللى طلع من ضرب البيض.

تدخل الفرن على 180 لمدة حوالى 30 أو 35 دقيقة حسب نوع الفرن..

أول لما تخرج من الفرن وهى سخنة نسقيها بالشربات البارد ونزوقها بالمكسرات أو جوز الهند..

ملحوظة * لو عايزة تقدميها لأسرتك بطبق تقديم .. يفضل قلب الكيك من الصينية وهى دافية مش باردة عشان الشربات هيمسك فى الصينية ويبقى عامل زى العسل.

تقدم باردة وبالهنا والشفا

Facebook Comments