السعادة وراحة البالمذكرات أم

كشف حساب السنة الجديدة

 

كشف حساب السنة الجديدة

السنة الجديدة بدأت خلاص. أنا بالنسبة ليا فيه حاجات كتير جدا مش راضية عنها حصلت في السنة اللى فاتت نفسي أغيرها تماما فى السنة الجديدة

– حاولي اليومين دول تعملي كشف حساب لنفسك من غير ما تضحكي علي روحك، خليكي صريحة و شوفي إية المشاكل اللي بجد لازم تشتغلي عليها في السنة الجديدة

– إمسكي ورقة و قلم وإكتبي الحاجات اللي بدأتي فيها ونفسك تكمليها وهتعملي إيه علشان أهدافك للسنة الجديدة بجد تتحقق

– لو عندك حلم صغير نفسك فية قرري إن الحلم دا لازم يشوف النور مهما كان باين إنه مستحيل أو صعب. لو جربتي مش هتخسري حاجة لكن لو مجربتيش هتخسري إحساس بالنجاح ممكن تكوني حارمة نفسك منه

– لو عندك شغف أو موهبة لأي حاجة في حياتك أشجعك تحاولي تستغليها و تعملي منها مكسب بسيط. أعرف ناس كتير بدأت مشروعات ناجحة جدا بمجرد هواية و دا بيبقي مريح للأمهات علشان ممكن تقدري تشتغلي من البيت

– راجعي علاقتك ببيتك وولادك وجوزك وعيلتك وشوفي لو تحبي تشتغلي علي حاجة فيهم

– أشجعك تكتبي أهداف عريضة للسنة كلها و نقط محددة تشتغلي عليها كل شهر. ركزي كل شهر علي هدف هتلاقي علي آخر السنة إن شاء الله عملتي ١٢ حاجة

– دلعي نفسك و دي نصيحة مؤثرة و دا مش معناه إني بحرضك تصرفي فلوس أو تكوني أنانية. بالعكس الدلع دا ممكن يكون كتاب حلو، قعدة حلوة مع ناس بتحبيها، اكتبي أو إرسمي لو دا بيسعدك، إلعبي رياضة علشان تخرجي الطاقة السلبية، حاجات من هذا القبيل

– أنا جبت لنفسي نوتة علشان شغلي و نوتة علشان البيت و كل واحدة أحط فيها كل الحاجات المهمة المطلوبة مني علشان أقدر أركز أكتر و أنجز أحسن من السنة اللي فاتت

– شوفي إيه اللي وقعك السنة دي و إوعدي نفسك إنه مش هيتكرر

– شوفي لو فيه حاجة مزعلاكي جامد خرجيها أو فضفضي بيها

– النظام النظام النظام: كلمة السر وسر نجاح أي بيت وأم. نظمي وقتك، نظمي وقت الطبيخ، نظمي الهدوم و حاجة الولاد في البيت، حاجة المطبخ وهكذا. دا هيساعدك تبقي مقتصدة في البيت وعارفة إحتياجاتك صح وهتفرق في سرعتك ووقتك و أعصابك

إفتكري إنك مهما كنتي زعلانة، مفيش حاجة تستاهل زعلك ومهما كنتي تعبانة أكيد أحسن من غيرك. كل واحدة فينا شايفة حياتها صعبة أو ولادها متعبين بتحس إنها مرفهة لما تشوف أم معاها طفل عنده مشكلة صحية.

إفتكروا دا دايما علشان الواحد لما بيكون زعلان أو سلبي حياته كلها بتبوظ. الناس الناجحة اللي حوالينا ناجحة علشان عايزة تنجح مش علشان حظها حلو

Facebook Comments

ديانا فريد

ديانا هي زوجة وأم لطفل توأم مستوحاة من الموسيقى والطبيعة والتفاعلات اليومية في الحياة. تستخدم شغفها بالكتابة لالتقاط اللحظات الخاصة واستبدال الضحك بالألم وإلهام الآخرين. كاتبة طويلة في العديد من المنشورات في مصر والخليج. من خلال Twin Mummy’s Diary تشارك أفكارها وخبراتها ونصائح مفيدة أثناء انتقالها نحن من خلال ركوب الأفعوانية تسمى الأمومة ، مع تحدياتها وأفراحها.

زر الذهاب إلى الأعلى