السنوات الأولىالطفل العنيدبعد الخمس سنواتسنوات المراهقة

ضرب الأطفال وآثاره النفسية

 
 this-dad-needed-to-smack-his-child-so-he-called-in-the-cops-20150105122851.jpg-q75,dx720y432u1r1gg,c--

ضرب الأطفال وآثاره النفسية

٧٨٪ من الأطفال في مصر من سن ١ ل ١٤ بيتضربوا كل يوم من أهلهم في البيت. ضرب الطفل ليه تأثير سلبي كبير جدا على نمو عقله وقدرته على التعلم ونتايجه في المدرسة وإحتماليه تعرضه لمشاكل نفسية في المستقبل، وممكن يزرع أفكار ومعتقدات جوا الطفل بتعيش معاه طول عمره.
ولو ما حصلش مجهود جامد أوي منه لما يكبر أو من حد يساعده في حياته، بيبقى صعب أوي إن المعتقدات دي تتغير وبتأثر على سلوكه وصورته قدام نفسه وتصرفاته طول حياته.
مش كل طفل بيتضرب لازم يحصل له كل ده، بس الأبحاث بتقول إن إحتمالية إن حاجة أو أكتر من الحاجات دي تحصل بتزيد أوي في الأطفال اللي بتعيش تجربة العنف، والإختلافات الفردية ووجود حد تاني ف حياة الطفل بيحترمه وبيعامله باحترام ومحسسه إنه كويس وإنه عايز يساعده ممكن تقلل من أضرار العنف اللي مر بيه.
لو أنا طفل ومامتي وبابايا بيضربوني. بتعلم إيه عن نفسي وعن الدنيا وعن علاقاتي بالناس؟
. “أنا وحش أوي وأستاهل أتضرب، وأي حد بقصر في حقه وبغلط قدامه من حقه يأذيني وأنا أتقبل ده عادي لأني أنا وحش وأستاهل.”
. “الغلط مش حاجة مقبولة ولا طبيعية، وبخاف منها، ف هافضل طول عمري بخاف من الغلط والفشل، ومش هاخد مجازفات في حياتي، هفضل دايما في السهل المضمون.”
 . “الضرب والعنف تصرف مقبول لما حد يعمل حاجة ما تعجبنيش. من حقي أضرب اخواتي وأصحابي لما حاجة تحصل ما تعجبنيش، ولما أبقى أقوى شوية بس ممكن أمد إيدي على مامتي وبابايا” (وده بيحصل فعلا كتير أوي دلوقتي في فترة المراهقة).
. عادي إن حد يبقى بيحبني جدا وخايف عليا ويأذيني جسديا أو نفسيا، لأن ماما وبابا بيقولولي إنهم بيضربوني عشان بيحبوني وخايفين عليا، فلما أكبر وأكون فى علاقة مثلا الطرف التاني بيعمل أي نوع من أنواع الأذى النفسي والجسدي وبيقنعني إنه بيحبني، إحتمالية اني أتقبل الفكرة دي بتعلى جدا.
. تقييمي لذاتي بيفضل مهزوز طول الوقت، وده طبعا غير الثقة بالنفس، ممكن الشخص من برا يكون باين عليه إنه واثق ف نفسه وساعات يمكن بزيادة، لكن حبه لنفسه وتقبله لصفاته وأفعاله تفضل متأثرة ومهزوزة.  وده بيأثر على شخصيته واهتمامه الزايد لإرضاء الناس بأي تمن.
. أنا بخاف من أهلي، وبخاف يعرفوا أنا عملت إيه، فهركز كل مجهودي في إني أخبي عليهم كل حاجة بعملها، وده بيخليهم ساعات يفتكروا إن الضرب جايب نتيجة، علشان أنا ببقى أشطر فى إني أخبي  تصرفاتي وساعات حتى من غضبي بعمل كل الحاجات إللي بيضربوني عليها لمجرد العند من غير ما يعرفوا. وعمري ما هقع فى مشكلة وأجي أتكلم معاهم عشان المحرك الأساسي لعلاقتنا الخوف.
 أكتر نسبة ضرب فى مصر بتحصل لأطفال في السن من ٣ ل ٥، سن في قمة الضعف والغلب، ما لوش قدرة يدافع عن نفسه، ومحتاج لحب أهله لدرجة إنه بيتضرب ومن الرعب بيجري يعيط فى حضن إللي بيضربه من كتر ما هو محتاجلهم ولحبهم. إتكلموا مع الناس إللي حواليكم علشان معظمهم مش عارف أد إيه الضرب مضر، حتى لو حد كان بيضرب ولاده علشان ما يعرفش أضرار الضرب، لسه عنده فرصة يصلح علاقته بيهم ويقلل أو يمسح تأثير إللي فات.
#اكسر_دايرة_العنف
#بالهداوة_مش_بالقساوة
Facebook Comments

مي علوي

مي علوي متخصصة علاج نفسي وتربية. مي هي مؤسسة منظمة رايزنج هابي لخدمات التربية والإستشارات النفسية. مي حصلت على ماجستير في علم النفس من الجامعة الأمريكية بالقاهرة، وحصلت على التدريب في التربية الإيجابية في المملكة المتحدة. مي قامت بتدريب مـئات الآباء والمدرسين والأخصائين على أسس التربية الإيجابية والصحة النفسية للأطفال والمراهقين

زر الذهاب إلى الأعلى