رسالة لأمى فى عيدها
ماما حبيبتى كل سنة وانتي فى عينيا أحلى أم . كل سنة وانتي جنبى ، وابتسامتك بتنور طريقى وتخلى كل الصعب يهون.
أنا عارف إن الرحلة كانت طويلة، وتجاربك وخبراتك معايا كانت بالمفاجآت والتحديات مليانة. سهر وتعب وقلق وخوف من بكرة واللى جاى.
نفسى تعرفى إن اختلافي معاكي فى الرأى مش خلاف، دى سنة حياة خلقها ربنا بين كل العباد. لازم ما نسلمش بكل اللى يتقال، عشان يكون فى جديد فى الكون نحسه ويتشاف.
زعلك عندى حاجة كبيرة مقدرش أتحملها، بس فى نفس الوقت بلاش تستخدمي الموضوع ده كوسيلة ضغط عليا.
إذا لقيتيني بعدت عنك شوية اتأكدي إني راجع. الفكرة إني كل ما بكبر بحتاج أحس إنى بحرية بعقلى بفكر. ومن غير ضغط عليا بقرر، اللى عقلى الحر شايفه حتى لو غلط. عارفك خايفة عليا من الغلط، ولما بيحصل تقوليلى” كام مرة حذرتك!”. الغلط تجربة بنتعلم منها ونخرج أقوى من اللى فات.
أنا دايما عايز أكون زى ما أنت عايزانى أكون، أحقق لك أحلامك و تشوفى فيا ثمارسنين تعبك. بس أعذريني لو مقدرتش أحقق الصورة كاملة، لأن عندى قدرات تانية مدفونة محتاجك تشوفيها ونكمل مع بعض الصورة، اللى نرضى عنها بعقلنا ويفرح بيها قلبنا.
حاجتين عايزهم دايما منك مهما حصل منى، حنانك ودعائك. مهما تاه بيا الطريق أو انشغلت بأضواء وبريق حاجات تانية غير الهدف، هرجع تانى على الطريق لأنك زرعتى فيا الإرادة والخير والأمل، اللى بقت جذورهم جوايا قوية. بس عادى كل نبتة بتتعرض لرياح وترجع تقف وتفتح من جديد.
أشكر ربى أنه خلقنى وخلقك تكونى أمى
ريهام سمير مستشارة مهنية في التعلم وتنمية المهارات الشخصية. ريهام أخصائية معتمدة في عسر القراءة من مركز بلاكفورد – لندن وعضو في جمعية عسر القراءة البريطانية. وهي مُعلمة معتمدة للانضباط الإيجابي في الفصل الدراسي من الرابطة الدولية للانضباط الإيجابي في الولايات المتحدة الأمريكية ، ومُنسِّقة معتمدة في اللغة الإنجليزية في TEFL وممارس معتمد في البرمجة اللغوية العصبية من المجلس الأمريكي للغة البرمجة اللغوية العصبية. تطبق ريهام تقنيات التعلم والتعليم الخصوصية الأكثر تقدمًا لخدمة أنواع عديدة من العملاء من مختلف الأعمار والأنظمة التعليمية.
